ᐅᖃᖅᑎᑦᑎᔩ, ᖁᕕᐊᓚᐅᖅᑐᖓ ᑐᙵᓱᑦᑎᑦᓯᒍᓐᓇᓚᐅᕋᒪ ᐅᑭᐅᖅᑕᖅᑐᒥ ᐱᓕᕆᔨᐅᖃᑎᓐᓂᒃ, ᔫᑳᓐ ᓯᕗᓕᖅᑎᖓ ᕌᓐᔾ ᐱᓚᐃ ᐊᒻᒪᓗ ᓄᓇᑦᓯᐊᑉ ᓯᕗᓕᖅᑎᖓ ᕋᔭᐃ ᓯᒻᑉᓴᓐ, ᒥᑦᑎᒪᑕᓕᒻᒥ ᒪᐃ 6-ᒥᒃ 9-ᒧᑦ ᐊᕐᕌᒍᑕᒫᖅᓯᐅᑎᑦᑎᓐᓂᒃ ᐅᑭᐅᖅᑕᖅᑐᒥ ᓯᕗᓕᖅᑏᑦ ᑲᑎᒪᓂᖓᓂ.
ᑲᑎᒪᓂᑦᑎᓐᓂ ᐅᖃᐅᓯᖃᓚᐅᖅᑐᒍᑦ ᐊᑕᖏᖅᑐᑕ ᓯᕗᓪᓕᐅᑎᒍᒪᔭᑦᑎᓐᓂᒃ, ᐃᓚᒋᔭᐅᓪᓗᓂ ᐅᑭᐅᖅᑕᖅᑐᒥ ᐅᐊᑦᓯᔨᓂᐅᓂᖅ ᑲᓇᑕᓗ ᓇᒻᒥᓂᖃᕐᓂᖓᓂᒃ ᓇᓗᓇᐃᖅᓯᓯᒪᓂᕐᒥᒃ, ᐱᓂᕐᓗᐊᕿᔪᒻᒪᕆᐅᔪᖃᖅᑎᓪᓗᒍ ᐅᐸᓗᖓᐃᔭᖅᓯᒪᓂᕐᒧᑦ ᑐᐊᕕᕐᓇᖅᑐᓕᕆᓂᕐᒧᓪᓗ, ᐱᒻᒪᕆᐅᔪᑦ ᐊᑭᑐᔫᑎᑦ ᐊᒥᒐᕐᓂᖏᓐᓂᒃ, ᐃᓪᓗᑭᑦᓴᕐᓂᕐᒥᒃ, ᐋᓐᓂᐊᖃᕐᓇᖏᑦᑐᓕᕆᓂᕐᒧᓪᓗ ᖃᓄᐃᑦᑕᐃᓕᑎᑦᓯᓂᕐᒧᓪᓗ ᐅᑭᐅᖅᑕᖅᑐᒥᐅᑕᕐᓂᒃ.
ᖁᔭᓐᓇᒦᕈᒪᔭᕋ ᐱᖃᓐᓇᕆᔭᕋ, ᓕᕙᐃ ᐹᓇᐸᔅ, ᐊᖏᔪᖅᑳᑉ ᑐᒡᓕᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ, ᐊᒻᒪᓗ ᒥᓂᔅᑕ ᑭᐅᕋᓐ ᓄᑕᕋᖅ, ᒪᐃᔭ ᔪᓱᐊ ᐋᕆᐊᒃ ᐊᒻᒪᓗ ᐃᓐᓇᒻᒪᕇᑦ ᓄᓇᖅᑲᑎᒌᓪᓗ ᒥᑦᑎᒪᑕᓕᒻᒥ ᑐᙵᓱᑦᑎᑦᓯᓚᐅᕐᖓᑕ ᐊᒥᖅᑳᕈᑎᖃᖅᑐᑎᓪᓗ ᖃᐅᔨᒪᓂᕐᒥᓂᒃ ᕼᐊᒻᓚᖓᑕ ᒥᑦᓵᓄᑦ ᓂᐅᕐᕈᓯᒪᔪᖁᑎᑦᑎᓐᓄᑦ.
ᐅᖃᖅᑎᑦᑎᔩ, ᐱᓗᐊᖑᐊᕐᓂᐅᓚᐅᖅᑐᖅ ᑲᔾᔮᓇᖅᑐᒥ ᒥᑦᑎᒪᑕᓕᒻᒥ ᓅᑦᑎᑕᐅᓯᒪᑎᓪᓗᑕ ᓯᓈᖓᓄᑦ. ᐅᓪᓗᓂᒃ ᐱᖓᓱᓂᒃ ᐅᖃᖃᑎᒌᒍᑎᖃᓚᐅᖅᑎᓪᓗᑕ ᐅᑭᐅᖅᑕᖅᑐᖅ ᓇᒻᒥᓂᕆᔭᐅᓂᖓᓂᒃ ᓇᓗᓇᐃᖅᓯᓯᒪᓂᕐᒧᑦ ᐅᐊᑦᓯᔭᐅᒋᐊᖃᕐᓂᖏᓄᓪᓗ ᓅᓚᐅᖅᑐᒍᑦ ᐅᑭᐅᖅᑕᖅᑑᑉ ᓱᓪᓗᑯᑖᖓᓄᑦ. ᐃᓚᐅᖃᑕᐅᓚᐅᖅᑐᒍᑦ ᐊᒥᓱᓄᑦ ᓄᓇᖅᑲᑎᒌᓄᑦ, ᐊᒻᒪᓗ ᓇᐅᑦᑎᖅᓱᖅᑏᑦ ᐃᓄᐃᑦ ᓇᐅᑦᑎᖅᓱᖅᑎᖏᑦ.
ᓯᓈᖓᓃᑦᑐᑕ, ᐊᖑᓇᓱᑦᑏᑦ ᓇᓐᓄᓚᐅᖅᑐᑦ, ᖁᑭᖅᓯᓪᓗᖓᓗ ᓇᑦᓯᕐᒥᒃ − ᐊᒥᖅᑳᕈᑕᐅᓂᐊᖅᑐᓂ ᓄᓇᓕᓐᓂ. ᓂᐅᕐᕈᓯᒪᓂᕆᓚᐅᖅᑕᕗᑦ ᑕᑯᒍᑎᒋᒍᓐᓇᓚᐅᖅᑕᕗᑦ ᐱᒻᒪᕆᐅᓂᖓᓂᒃ ᐊᖑᓇᓱᖃᑦᑕᕐᓂᕐᒥᒃ ᓄᓇᓕᑦᑎᓐᓂ ᖃᓄᕐᓗ ᐃᓅᓯᕗᑦ ᐊᑦᑐᐊᓂᖃᕐᓂᖓᓂᒃ ᓄᓇᒧᑦ ᓂᕐᔪᑎᓄᓪᓗ.
ᐅᖃᖅᑎᑦᑎᔩ, ᑲᑎᒪᓂᐅᕙᑦᑐᑦ ᑖᓐᓇᑎᑐᑦ, ᐱᒻᒪᕆᐅᔪᑦ ᓴᙱᓕᖅᐹᓪᓕᕈᑎᖃᕐᓂᕐᒧᑦ ᓂᐱᑦᑎᓐᓂᒃ ᐅᑭᐅᖅᑕᖅᑐᒥ ᓯᕗᓕᖅᑎᐅᓪᓗᑕ ᓯᕗᕐᖓᒍᑦ ᑲᑎᒪᒋᐊᓚᐅᖅᑎᓐᓇᑕ ᖃᓪᓗᓈᓂ ᐊᕕᑦᑐᖅᓯᒪᓂᐅᔪᓂ ᓯᕗᓕᖅᑎᐅᖃᑎᑦᑎᓐᓂᒃ ᐱᖓᓐᓇᕐᒥ ᓯᕗᓕᖅᑏᑦ ᑲᑎᒪᓂᖓᓂ ᐊᒻᒪᓗ ᑲᓇᑕᒥ ᑲᑐᔾᔨᖃᑎᒌᑦᑎᐅᔪᑦ ᑲᑎᒪᔨᖏᓐᓄᑦ ᐊᐅᔭᐅᓂᐊᖅᑐᖅ.
ᖁᔭᓐᓇᒦᒃ, ᐅᖃᖅᑎᑦᑎᔩ.