ᐅᖃᖅᑎᑦᑎᔩ ᐊᒃᑐᐸ 11-ᒥ ᑖᓐ ᕚᓪᑕᓪ, ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ ᐅᕙᖓᓗ, ᑐᙵᓱᑦᑎᑦᓯᖃᑎᒌᓚᐅᖅᑐᒍᒃ ᑕᓪᓕᒪᖓᓐᓂ ᐊᕐᕌᒍᑕᒫᑦ ᐅᑭᐅᖅᑕᖅᑐᒥ ᐊᑐᐊᒐᓕᕆᓂᕐᒧᑦ ᓯᕗᓕᖅᑏᑦ ᑲᑎᒪᔨᕋᓛᑦ ᑲᑎᒪᓂᖓᓂᒃ ᐃᖃᓗᓐᓂ.
ᑲᑎᒪᖃᑕᐅᓚᐅᖅᑐᒍᒃ ᓄᓇᓯᐊᕐᒥ ᓯᕗᓕᖅᑎ ᐊᕐᔭᐃ ᓯᒻᑉᓴᓐ, ᓄᓇᖃᖅᑳᖅᑐᒥᓃᑦ ᐊᕕᑦᑐᖅᓯᒪᓂᐅᔪᓂᓗ ᓯᕗᓕᖅᑏᑦ ᐊᒻᒪᓗ ᒐᕙᒪᑐᖃᒃᑯᓐᓂᒃ, ᐊᕕᑦᑐᖅᓯᒪᓂᐅᔪᓂᒃ, ᖃᓪᓗᓈᓂᓗ ᐊᕕᑦᑐᖅᓯᒪᓂᐅᔪᓂᒃ ᑲᑐᔾᔨᖃᑎᑦᑎᓐᓂᒃ ᐸᕐᓇᐅᑎᒧᑦ. ᒥᓂᔅᑕ ᕚᓐᑖᓪ ᒐᕙᒪᑐᖃᒃᑯᓐᓂ ᒥᓂᔅᑕᐅᖃᑎᖓ ᔮᓐ ᕗᕋᐃᓱ, ᒥᓂᔅᑕ ᐃᓪᓗᓕᕆᔨᒃᑯᓐᓄᑦ, ᐊᑭᑐᔫᑎᓕᕆᔨᒃᑯᓐᓄᑦ ᓄᓇᓕᓐᓄᓪᓗ, ᑲᑎᖃᑎᒋᓚᐅᖅᑕᕗᑦ ᒥᓚᓂ ᔫᓖ, ᒥᓂᔅᑕ ᑲᓇᑕᐅᑉ ᓯᓚᑖᓃᖔᖅᑐᓕᕆᓂᕐᒧᑦ; ᐱᐅᓪ ᐱᓕᐅ, ᒥᓂᔅᑕ ᐅᓇᓕᑦᓴᔭᒃᑯᓐᓄᑦ; ᐊᒻᒪᓗ ᔭ’ᐊᕋ ᓵᒃᔅ, ᒥᓂᔅᑕ ᐃᓱᒪᓕᕆᓂᕐᒧᑦ ᐊᔪᓕᕈᑎᖃᖅᓯᒪᔪᓕᕆᓂᕐᒧᓪᓗ ᒥᓂᔅᑕᐅᑉ ᑐᒡᓕᐊ ᐋᓐᓂᐊᖃᕐᓇᖏᑦᑐᓕᕆᔨᕐᔪᐊᒃᑯᓐᓄᑦ ᐃᓚᐅᖃᑕᐅᓚᐅᖅᑐᑦ ᖃᕆᓴᐅᔭᒃᑯᑦ.
ᒥᓂᔅᑕᐃᑦ ᑕᐃᕕᑎ ᔪᐊᓇᓯ, ᔮᓐ ᒪᐃᓐ ᐊᒻᒪᓗ ᑖᓂᐅᓪ ᖃᕝᕕᒃ ᑲᑎᒪᖃᑕᐅᓚᐅᕐᒥᔪᑦ.
ᐅᖃᖅᑎᑦᑎᔩ, ᑲᑎᒪᑎᓪᓗᑕ ᐅᖃᖃᑎᒌᒍᑎᖃᓚᐅᖅᑐᒍᑦ ᐃᓱᒪᒋᔭᑦᑎᓐᓂᒃ ᐸᕐᓇᐅᑎᐅᑉ ᒥᑦᓵᓄᑦ ᐊᒻᒪᓗ ᓄᓇᕐᔪᐊᕐᒥ ᐅᑭᐅᖅᑕᖅᑐᓕᕆᓂᕐᒧᑦ ᐊᑐᐊᒐᓕᕆᓂᕐᒥᒃ, ᐅᑭᐅᖅᑕᖅᑐᖅ ᐅᐊᑦᓯᔭᐅᒋᐊᖃᕐᓂᖓᓄᑦ ᓴᐳᒻᒥᔭᐅᓗᓂᓗ, ᐅᑭᐅᖅᑕᖅᑐᒥ ᐃᓪᓗᓕᕆᓂᕐᒧᑦ ᐊᑭᑐᔫᑎᓕᕆᓂᕐᒧᓪᓗ, ᐃᓱᒪᓕᕆᓂᕐᒧᓪᓗ ᐊᔪᓕᕈᑎᖃᖅᓯᒪᔪᓕᕆᓂᕐᒧᓪᓗ.
ᐱᕕᖃᕐᓂᓐᓂ ᓇᓗᓇᐃᔭᐃᓚᐅᖅᑐᖓ ᒫᓐᓇᑲᐅᑎᒋ ᐱᔭᕆᐊᖃᕐᓂᑎᓐᓂᒃ ᑮᓇᐅᔭᖃᖅᑎᑕᐅᒻᒪᕆᒋᐊᖃᕐᓂᖏᓐᓂᒃ ᐅᑭᐅᖅᑕᖅᑐᒥ ᐊᖑᒻᒪᑎᒍᓐᓇᖅᓯᖁᓪᓗᑕ ᓄᓇᓕᓐᓂ ᐱᔭᐅᒋᐊᖃᓪᓚᕆᑦᑐᓂᒃ, ᐱᕕᑦᓴᖃᕐᕕᑦᑖᖅᑎᑦᓯᓗᑕ ᐱᕙᓪᓕᐊᔪᓕᕆᓂᕐᒧᑦ, ᓴᐃᒻᒪᖃᑎᒌᑉᐸᓪᓕᐊᓂᕐᒧᑦ ᑲᓇᑕᒥᓗ ᐅᑭᐅᖅᑕᖅᑐᖓᓂ ᓴᐳᒻᒥᔮᕆᓂᕐᒧᑦ ᓇᐅᑦᓯᖅᑐᕐᓂᕐᒧᓪᓗ.
ᐱᒋᐊᖅᑎᑕᐅᓚᐅᖅᓯᒪᔪᖅ 2019-ᒥ, ᐅᑭᐅᖅᑕᖅᑐᒥ ᐊᑐᐊᒐᓕᕆᓂᕐᒧᑦ ᐸᕐᓇᐅᑎ ᐋᖅᑭᑦᓱᐃᒍᑕᐅᓯᒪᔪᖅ ᐊᑕᖏᖅᑐᑕ ᑕᑯᒍᒪᔭᑦᑎᓐᓂᒃ ᓯᕗᓂᑦᓴᑎᓐᓂ ᑐᙵᕕᖃᑦᓯᐊᖅᑐᒥᒃ, ᓇᒻᒥᓂᖅ ᒪᑭᑕᔪᓐᓇᖅᑐᓂᒃ ᐃᓅᖃᑎᒌᓂᒃ ᓄᓇᓕᓐᓂᓪᓗ ᐱᓕᕆᖃᑎᒌᓐᓂᒃᑯᑦ ᐆᒻᒪᕆᑦᓯᐊᖅᑐᓂᒃ, ᖃᑭᕙᓪᓕᐊᔪᓂᒃ, ᒪᑭᒪᔪᓐᓇᕐᓂᖃᑦᓯᐊᖅᑐᓂᓪᓗ ᐅᑭᐅᖅᑕᖅᑐᒥ ᐊᖏᕐᕋᕆᔭᑦᑎᓐᓂ ᑲᓇᑕᐅᓪᓗ ᓯᓚᑖᓂ. ᐊᑐᐊᖅᑕᐅᓂᐊᖅᑐᖅ ᑲᓇᑕᐅᑉ ᒐᕙᒪᒃᑯᖏᑕ ᓯᕗᓪᓕᐅᑎᒋᐊᖃᕐᓗᓂᒋᑦ, ᖃᓄᐃᓕᐅᕈᑎᒋᓗᓂᒋᑦ, ᑮᓇᐅᔭᖃᖅᑎᑦᓯᒍᑎᒋᓗᓂᒋᓪᓗ ᐅᑭᐅᖅᑕᖅᑐᒥ 2030-ᒧᑦ ᑭᖑᓂᐊᒍᓪᓗ, ᓇᓕᒧᒌᑎᑦᓯᒍᑕᐅᓂᖅᓴᐅᔪᖅ ᑲᓇᑕᒥ ᑲᓇᑕᐅᓪᓗ ᓯᓚᑖᓂ ᐊᑐᐊᒐᓕᕆᓂᕐᒧᑦ ᑐᕌᒐᖏᓐᓂᒃ ᓯᕗᓪᓕᐅᑎᒍᒪᓯᔭᖏᓐᓄᑦ ᓄᓇᖃᖅᑳᖅᑐᒥᓃᑦ ᑭᒃᑯᓕᒫᓪᓗ ᐅᑭᐅᖅᑕᖅᑐᒥᐅᑕᐅᔪᓄᑦ.
ᐅᑭᐅᖅᑕᖅᑐᒥ ᓯᕗᓕᖅᑎᐅᓪᓗᑕ ᓄᓇᖃᖅᑳᖅᑐᒥᓂᐅᓪᓗᑕᓗ ᓯᕗᓕᖅᑎᐅᓪᓗᑕ, ᐱᓕᕆᐊᖃᖅᓯᒪᔪᒻᒪᕆᐅᔪᒍᑦ ᐊᑐᓕᖅᑎᑕᐅᖁᓪᓗᒋᑦ ᑕᑯᔭᐅᒍᒪᔪᑦ ᐅᑭᐅᖅᑕᖅᑐᒥ ᐊᑐᐊᒐᓕᕆᓂᕐᒧᑦ ᐸᕐᓇᐅᑎᒧᑦ ᐋᖅᑭᑦᓯᐅᓪᓗᑕᓗ ᐊᑯᓂᐅᔪᒧᑦ ᓯᕗᓂᑦᓴᑎᓐᓄᑦ ᐱᕕᖃᕐᕕᐅᒍᓐᓇᖅᑐᓂᒃ ᐅᑭᐅᖅᑕᖅᑐᒥ.
ᐅᖃᖅᑎᑦᑎᔩ, ᑲᑎᒪᑎᓪᓗᑕ ᓇᓗᓇᐃᖅᓯᒋᐊᒃᑲᓐᓂᓚᐅᖅᑐᖓ ᑭᖑᕙᓗᐊᖏᓐᓂᖓᓂ ᒐᕙᒪᑐᖃᒃᑯᑦ ᐱᓕᕆᒋᐊᕆᐊᖃᕐᓂᖏᓐᓂᒃ ᐱᕚᓪᓕᕈᑕᐅᒍᓐᓇᖅᑐᓂᒃ ᑮᓇᐅᔭᖃᖅᑎᑦᓯᓂᕐᒧᑦ ᐅᑭᐅᖅᑕᖅᑐᒥ ᑕᑯᒍᓐᓇᖅᓯᖁᓪᓗᑕ ᑕᑯᒍᒪᔭᒃᑎᓐᓂᒃ ᐸᕐᓇᐅᑎᓂ.
ᖁᔭᓐᓇᒦᒃ, ᐅᖃᖅᑎᑦᑎᔩ.