ᐅᖃᖅᑎᑦᑎᔩ,
ᐅᓪᓗᒥ ᓇᖏᖅᓯᕗᖓ ᑐᓴᖅᑎᑦᑎᔪᒪᓪᓗᖓ ᑲᓇᑕᒥ ᓯᕗᓕᖅᑏᑦ ᑲᑎᒪᔨᖏᓐᓂᒃ ᕕᕗᐊᕆ 2025−ᒥ ᐱᓕᕆᐊᒃᓴᕆᑎᑕᐅᔪᓂᒃ ᐊᒥᐊᓕᒐᐃᑦ ᓄᓇᖓᓄᑦ ᑭᒡᒐᖅᑐᐃᖁᓪᓗᒋᑦ ᓴᙱᓂᖅᓴᒥᒃ ᐊᒃᑐᐊᖃᑦᑕᐅᑎᖁᓪᓗᒋᑦ ᖃᓂᒋᔭᕗᑦ ᓄᓇᓖᑦ.
ᐅᖃᖅᑏ, ᓯᕗᓪᓕᖅᐹᑦᑎᐊᕐᒥ, 13-ᖑᔪᑦ ᑲᓇᑕᒥ ᓯᕗᓕᖅᑎᐅᔪᑦ ᓂᐅᕐᕈᓚᐅᖅᑐᑦ ᐅᐊᓯᖕᑕᓐᒧᑦ, ᑏᓰᒧᑦ ᐱᓇᓱᐊᕈᓯᖓᓂ ᕕᕝᕗᐊᕆ 10, ᑐᓴᖅᑎᑦᑎᔭᖅᑐᖅᑐᑎᒃ ᓂᕈᐊᖅᑕᐅᕋᑖᖅᑐᓄᑦ ᐊᓪᓚᕝᕕᓕᕆᔨᐅᔪᓄᑦ ᐊᒻᒪᓗ ᐊᓯᖏᓐᓄᑦ ᐊᒥᐊᓕᒃᑲᒥᐅᓄᑦ ᓂᕈᐊᖅᑕᐅᓯᒪᔪᓄᑦ ᑕᒪᒃᑯᐊ ᑲᓇᑕᒥ ᐱᖁᑎᐅᔪᑦ ᐋᓐᓂᖅᑎᑦᑎᒐᔭᕐᒪᑕ ᐃᖅᑲᓇᐃᔭᖅᑎᐅᔪᓂᒃ ᐊᒻᒪᓗ ᐱᓕᕆᕕᐅᔪᓂᒃ ᑕᒪᒃᑮᓐᓂ ᑭᓪᓕᖓᓂ.
ᑲᑎᖃᑎᖃᓚᐅᖅᑐᒍᑦ ᓄᓇᓕᕐᔪᐊᓂ ᐊᕕᒃᑐᖅᓯᒪᔪᓂ ᐊᖏᖃᑎᒌᒍᑎᒃᓴᒧᑦ ᑲᑎᒪᔨᓂᑦ, ᐊᒥᐊᓕᑲᒥᓪᓗ ᐊᒻᒪᓗ ᑲᓇᑕᒥᑦ ᓇᖕᒥᓂᖁᑎᓕᖕᓂᑦ ᐃᖅᑲᓇᐃᔭᖅᑎᓂᒡᓗ ᓯᕗᓕᖅᑎᓂᑦ. ᖃᐃᖅᑯᔭᐅᓚᐅᕆᕗᒍᑦᑕᐅᖅ ᐊᒥᐊᓕᒐᐃᑦ ᑲᑎᒪᕕᖓᑕ ᐃᒡᓗᕐᔪᐊᖓᓄᑦ ᑲᑎᖃᑎᖃᖁᔭᐅᓪᓗᑕ ᖁᑦᑎᒃᑐᒦᓐᓂᖅᓴᓂᒃ ᐅᖃᐅᔾᔪᐃᔨᓂᒃ ᐊᖓᔪᖅᑳᒧᑦ ᑐᕋᒻᑉᒧᑦ.
ᐅᖃᖅᑎᑦᑎᔩ, ᖁᕕᐊᓱᒃᐳᖓ ᒪᓕᒐᓕᐅᖅᑎᐅᖃᑎᒃᑲ, ᓄᓇᑦᓯᐊᕐᒥᐅᑦ ᓯᕗᓕᖅᑎᖓ ᓯᒻᑉᓴᓐ, ᐊᒻᒪ ᔫᑳᓐ ᓯᕗᓕᖅᑎᖓ ᐱᓚᐃ, ᐅᕙᖓᓗ, ᐱᓕᕆᖃᑎᒌᒃᑲᓐᓂᓚᐅᕆᓪᓗᑕ ᐅᑭᐅᖅᑕᖅᑐᒥᐅᑦ ᐱᔪᒪᔭᖏᓐᓂᒃ ᐃᓱᒪᒋᔭᖏᓐᓂᒡᓗ ᑲᓇᑕᒥ ᑲᑎᒪᔾᔪᑎᒃᓴᓂᒃ.
ᑲᓇᑕᒥ ᓯᕗᓕᖅᑏᑦ ᑲᑎᒪᔨᖏᑦ ᑲᑎᒪᓚᐅᖅᑎᓪᓗᒋᑦ, ᐅᑭᐅᖅᑕᖅᑐᒥ ᓯᕗᓕᖅᑏᑦ ᐃᓚᐅᓚᐅᖅᐳᑦ ᖃᔅᓯᑲᓪᓚᖕᓂᒃ ᑲᑐᔾᔨᖃᑎᒌᒃᖢᑎᒃ ᐃᓚᐅᑎᑦᑎᓪᓗᑎᒃ ᓴᖅᑭᑦᑎᓇᓱᒃᖢᑎᒃ ᐊᑕᐅᓯᕐᒥᒃ ᑐᓴᒐᒃᓴᒥᒃ ᓴᙱᔪᒧᑦ ᐊᒻᒪ ᐃᖏᕐᕋᑦᑎᐊᖅᑐᒧᑦ ᐅᑭᐅᖅᑕᖅᑐᒧᑦ ᐊᒻᒪ ᐅᐊᖕᓇᒥᐅᓄᑦ.
ᐅᖃᖅᑏ, ᐅᑭᐅᖅᑕᖅᑐᒥ ᓯᕗᓕᖅᑎᐅᓪᓗᑕ ᐅᖃᓚᐅᕋᑦᑕ ᓴᙱᔪᒥᒃ ᑲᓇᑕ-ᐊᒥᐊᓕᒐᒃᑯᑦ ᐱᓕᕆᖃᑎᒌᖕᓂᖏᑦ ᑲᑐᔾᔨᖃᑎᒌᒋᐊᖃᓪᓚᕆᑦᑐᑦ ᐅᖃᐅᓯᖃᕐᓂᕐᒥᑦ ᑲᑐᔾᔭᐅᔭᕆᐊᖃᖅᑐᓂᑦ. ᑮᓇᐅᔭᓕᐅᕋᓱᖕᓂᕐᒧᑦ ᐱᕈᖅᐸᓪᓕᐊᓂᖅ ᐆᒻᒪᖅᑯᑎᓄᑦ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ, ᐱᕐᔪᐊᑦ ᐅᔭᕋᖕᓂᐊᒐᒃᓴᑦ, ᐊᒻᒪ ᑭᒡᓕᖓᓂ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᐱᓕᕆᖃᑎᒌᖕᓂᕗᑦ ᐱᓪᓗᐊᑕᐅᕗᖅ ᕿᓂᖅᑎᓪᓗᑕ ᑖᒃᑯᓂᖓ ᓴᖅᑭᑉᐸᓪᓕᐊᔪᓂᒃ ᐊᒃᓱᕈᕐᓇᖅᑐᓂᒃ.
ᑕᒪᓐᓇ ᐊᖏᕈᑕᐅᓯᒪᔪᖅ ᐱᒋᐊᖅᑎᑕᐅᒃᑲᓐᓂᓚᐅᖅᐳᖅ ᐅᓂᒃᑳᖅᑎᓪᓗᒋᑦ ᕕᐅᓪᓴᓐ ᑐᑦᑕᕐᕕᖓᓂ, ᓇᓗᓇᐃᖅᓯᓪᓗᑕ ᐱᒻᒪᕆᐅᓂᖓᓂᒃ ᐅᑭᐅᖅᑕᖅᑐᒥ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᐊᒻᒪ ᐱᕕᒃᓴᐃᑦ ᑐᑭᓕᐊᖃᑎᒌᒍᑕᐅᓗᑎᒃ ᐊᒻᒪ ᐱᓕᕆᖃᑎᒌᒍᑕᐅᓗᑎᒃ ᑲᓇᑕᒥ ᐊᒻᒪ ᐊᒥᐊᓕᒐᕐᒥᐅᓂᒃ ᐅᑭᐅᖅᑕᖅᑐᒥ.
ᐅᖃᖅᑏ, ᐃᓚᖓᑦ ᐊᐅᓪᓚᖅᓯᒪᓂᕆᓚᐅᖅᑕᑦᑕ ᑲᑎᒪᖃᑎᖃᓚᐅᖅᑐᒍᑦ ᑎᐊᓐᒫᒃᒥᒃ ᐊᒻᒪᓗ ᐊᑯᑭᑦᑐᓂᒃ. ᒫᓐᓇ ᐱᓂᖅᓴᐅᓕᖅᑐᖅ, ᐱᓕᕆᖃᑎᖃᖅᑐᒍᑦ ᑲᓛᖦᖡᑦ ᓄᓈᓐᓂ ᐱᓪᓗᐊᑕᐅᔪᓂᒃ ᐅᑭᐅᖅᑕᖅᑐᒥ ᐱᔾᔪᑕᐅᔪᓂᒃ, ᐃᓚᒋᔭᐅᓪᓗᓂ ᓴᐳᒻᒥᒃᖠᕐᓂᖅ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᒻᒪ ᒪᑭᒪᔾᔪᑎᓄᑦ ᐱᓕᕆᖃᑎᒌᒍᑕᐅᑐᐃᓐᓇᕆᐊᓖᑦ.
ᐃᓚᖓ ᐅᖃᐅᓯᐅᖏᓐᓇᖃᑦᑕᖅᑐᖅ ᐃᓚᕝᕕᒋᖃᑦᑕᓚᐅᖅᑕᓐᓂᑦ ᐅᐊᓯᖕᑕᓐᒥᑦ ᑮᓇᐅᔭᓂᑦ ᐱᕈᖅᓴᐃᔭᕆᐊᖃᕐᓂᖅ ᑲᓇᑕᒥᑦ−ᐱᕈᖅᓴᐃᓂᕐᒧᑦ ᒪᑭᒪᐅᑎᓂᑦ ᒪᒃᐲᔪᓐᓇᖅᑐᒥᒃ ᓄᓇᕘᑉ ᐱᒻᒪᕆᐅᔪᓂᑦ ᐅᔭᕋᖕᓂᑦ ᐆᒻᒪᖅᑯᑎᓄᓪᓗ.
ᖃᓄᖅᑑᕐᓂᒃᑯᑦ ᐱᓕᕆᖃᑎᒌᖕᓂᒃᑯᑦ ᐃᓄᐃᑦ ᑲᑐᔾᔨᖃᑎᒌᒃᑯᖏᑎᒍᑦ ᐊᒻᒪᓗ ᑲᔪᓰᓐᓇᕈᓐᓇᖅᑐᓂᒃ ᐱᕙᓪᓕᐊᑎᑦᑎᓂᒃᑯᑦ, ᓄᓇᕗᑦ ᓄᓇᙳᐊᕐᒧᐊᖅᑎᑦᑐᓐᓇᖅᑕᕗᑦ, ᐅᒃᐱᕆᔭᐅᔪᓐᓇᕐᓗᑕ ᐊᒻᒪᓗ ᑮᓇᐅᔭᖅᑎᒍᑦ ᐊᑐᑦᑎᐊᕐᓗᑕ.
ᐅᖃᖅᑎᑦᑎᔩ, ᐅᑭᐅᖅᑕᖅᑐᒥ ᒪᓕᒐᓕᐅᖅᑎᐅᖃᑎᒃᑲ, ᐅᕙᖓᓗ ᐅᖃᒃᑲᓐᓂᓚᐅᖅᐳᒍᑦ ᑐᓴᖅᑎᑦᑎᔪᒪᒐᑦᑕ ᐊᖏᖅᓯᒪᓂᑦᑎᓐᓂ ᑲᓇᑕᐅᑉ ᓄᓇᖁᑎᖓᓂ ᓯᕗᓪᓕᐅᑏᓐᓇᕐᓂᐊᖅᖢᑎᒍᓪᓗ ᐅᑭᐅᖅᑕᖅᑐᒥ ᐊᑦᑕᕐᓇᖅᑐᒦᑎᑦᑕᐃᓕᓂᕐᒥᒃ, ᐱᖃᓯᐅᔾᔨᓪᓗᓂ ᐅᑭᐅᖅᑕᖅᑐᒥ ᐆᒻᒪᖅᑯᑎᓕᕆᓂᕐᒥᒃ ᐊᒻᒪ ᑮᓇᐅᔭᓕᐅᕋᓱᖕᓂᕐᒧᑦ ᓴᐳᔾᔨᓂᕐᒥᒃ. ᐅᑭᐅᖅᑕᖅᑐᒥ ᓯᕗᓕᖅᑏᑦ ᓇᖏᖃᑎᒌᖕᓂᐊᖅᑐᑦ ᐊᓯᖏᓐᓂᒃ ᑲᓇᑕᒥ ᓯᕗᓪᓖᑦ ᒥᓂᔅᑕᓂᒃ ᓴᐳᒻᒥᓗᒋᑦ ᓴᙱᒃᑎᒋᐊᕐᓗᒋᓪᓗ ᒪᑭᐅᒪᐃᓐᓇᕈᑎᒃᓴᕗᑦ ᓄᓇᓕᕗᓪᓗ−ᐊᑕᐅᑦᑎᒃᑯᑦ, ᑲᓇᑕᒥᐅᑕᐅᓪᓗᑕ.
ᖁᔭᓐᓇᒦᒃ, ᐅᖃᖅᑎᑦᓯᔩ.