ᐅᖃᖅᑎᑦᑎᔩ, ᐊᓕᐊᓇᐃᒍᓱᑦᑎᐊᖅᐳᖓ ᑐᓴᖅᑎᑦᑎᔪᓐᓇᕋᒪ ᐊᕐᕌᒍᑕᒫᑦ ᐃᙱᐅᓯᐅᖅᑐᓂᒃ ᓵᓚᒃᓴᖅᑎᑦᑎᓇᓱᒃᐸᒃᑐᑦ, ᕿᓚᐅᑦ, ᐅᑎᕐᓂᖓᓂᒃ.
ᑕᒪᑐᒪᓂ ᐊᕐᕌᒍᒥ ᓇᓗᓇᐃᒃᑯᑕᐅᕗᑦ, ᕿᓚᐅᑦ ᖁᕕᐊᓲᑎᖃᖅᐳᑦ ᐊᕐᕌᒍᓄᑦ ᖁᓕᓄᑦ ᓇᓪᓕᐅᓐᓂᖅᓯᐅᖅᑎᓪᓗᒋᑦ. ᐱᕕᒃᓴᐅᕗᖅ ᐃᓱᒪᒃᓴᖅᓯᐅᕈᑎᖃᕐᓂᐊᕐᓗᓂ ᖃᓄᖅ ᕿᓚᐅᑦ ᓄᓇᕗᒻᒥᐅᑦ ᓂᐱᖏᓐᓂᒃ ᓴᙱᒃᑎᑉᐹᓪᓕᕈᑎᖃᖅᑎᑦᑎᖕᒪᒡᖓᑦ ᐃᓄᒃᑐᑦ ᐊᑐᖅᑕᐅᓂᖅᓴᐅᓕᕐᓗᓂ ᐃᖏᐅᓯᒃᑯᑦ.
ᐅᖃᖅᑎᑦᑎᔩ, ᐱᒋᐊᖅᑕᐅᓚᐅᖅᑎᓪᓗᒍ, ᕿᓚᐅᑦ ᐊᑐᐃᓐᓇᐅᑎᑦᑎᓯᒪᔪᖅ ᑐᙵᕕᒃᓴᒥᒃ ᓄᓇᕗᒻᒥᐅᓄᑦ ᑕᑯᒃᓴᐅᑎᑦᑎᓗᑎᒃ ᓴᓇᑐᓂᕐᒥᓂᒃ, ᑕᑯᓐᓈᒐᒃᓴᓂᑦ ᓂᔾᔭᐅᓯᔭᕈᓯᕐᒥᓂᒃ, ᐊᒻᒪᓗ ᓴᐳᔾᔨᓂᕐᒥᒃ ᐅᖃᐅᓯᑦᑎᓐᓂᒃ. ᑖᓐᓇ ᓵᓚᒃᓴᕋᓱᖕᓂᖅ ᓴᖅᑭᑉᐸᓪᓕᐊᔾᔪᑕᐅᕗᖅ ᐊᒻᒪ ᓴᖅᑭᑕᐅᔪᓄᑦ ᓴᓇᙳᐊᖅᑎᓄᑦ ᖁᕕᐊᓲᑎᖃᕈᓐᓇᕐᓗᑎᒃ ᐊᒻᒪ ᑲᑎᖃᑎᖃᕈᓐᓇᕐᓗᑎᒃ ᐃᓕᖅᑯᓯᑦᑎᓐᓂᒃ ᐃᙱᐅᓯᒃᑯᑦ ᐅᖃᐅᓯᒃᑯᓪᓗ. ᐊᕐᕌᒍᕆᓵᖅᑕᑦᑎᓐᓂᑦ, ᕿᓚᐅᑦ ᐃᑲᔫᑎᖃᓪᓚᕆᒃᓯᒪᕗᖅ ᐆᒻᒪᕆᐊᖅᑎᑦᑎᒃᑲᓐᓂᕐᓂᕐᒧᑦ ᐊᑐᖅᑕᐅᖏᓐᓇᕐᓂᖓᓄᓪᓗ ᐃᓄᒃᑐᑦ ᓄᓇᑦᑎᓐᓂ.
ᓇᓗᓇᐃᕐᓗᒍ ᑖᓐᓇ ᓇᓗᓇᐃᒃᑯᑕᖅ ᓇᓪᓕᐅᓐᓂᖅᓯᐅᕐᓂᖅ, ᕿᑎᐊᓃᑉᐳᒍᑦ ᑕᒪᑐᒪᓂ ᐊᕐᕌᒍᒥ ᓵᓚᒃᓴᕋᓱᖕᓂᕐᒥᒃ ᑖᒃᑯᓂᖓ ᐱᔾᔪᑕᐅᔪᓂ 2025−ᒧᑦ: ᐱᕈᕐᓴᑎᓪᓗᖓ ᐊᒻᒪᓗ ᐃᓄᐃᑦ ᓴᓇᓯᒪᔭᖏᑦ. ᑖᒃᑯᐊ ᐱᔾᔪᑕᐅᔪᑦ ᑐᙵᓱᒃᑎᑦᑎᔪᑦ ᐃᓚᐅᖃᑕᐅᔪᓂᒃ ᐃᖅᑲᐅᒪᖁᓪᓗᒋᑦ ᐱᒻᒪᕆᐅᓂᖏᓐᓂᒃ ᐅᖃᐅᓯᖅᐳᑦ ᐃᓕᖅᑯᓯᕗᓪᓗ, ᓂᕆᐅᒃᐳᒍᓪᓗ ᑐᓴᕐᓂᐊᕐᓂᑦᑎᓐᓂᒃ ᐊᔾᔨᒌᙱᑦᑐᓂᒃ ᑐᑭᓕᐅᕆᓂᐅᔪᓂ ᓴᓇᑐᔪᓂᒡᓗ ᐅᖃᕈᓯᕐᓂᒃ ᐱᔪᒪᓕᕈᑎᖏᓐᓂ. ᖁᕕᐊᓲᑎᒋᔪᒪᓪᓗᒍ ᖁᓕᒋᓕᖅᑕᖓᓂᒃ ᐊᕐᕌᒍᖃᓕᕐᓂᖓᓄᑦ, ᐱᓕᕆᕝᕕᒋᔭᕗᑦ ᐋᖅᑭᒃᓱᐃᒋᕗᑦᑕᐅᖅ ᐱᖓᓱᓂᒃ ᖁᙱᐊᖅᑕᐅᓂᐊᖅᑐᓂᒃ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᒥ ᑕᒪᒃᑯᓄᖓ ᓵᓚᖃᖅᑐᓄᑦ.
ᐅᖃᖅᑎᑦᑎᔩ, ᑭᖑᓪᓕᖅᐹᖅ ᐅᓪᓗᕆᔪᓐᓇᖅᑕᖓ ᑐᓂᓯᓂᐊᕐᓗᓂ ᒪᐃ 5, 2025−ᖑᕗᖅ, ᑎᓕᐅᖅᐸᒃᑲᓗ ᑕᒪᕐᒥᑦᑎᐊᖅ ᐱᔪᒃᓯᑎᑦᑎᔪᑦ ᓄᓇᕗᒻᒥ ᐃᙱᐅᓯᐅᖅᑏᑦ ᐃᓚᐅᖁᓪᓗᒋᑦ. ᓇᓗᓇᐃᔭᖅᓯᒪᔪᑦ ᑐᑭᓯᒋᐊᕈᑏᑦ ᖃᓄᖅ ᐃᓚᐅᖃᑕᐅᔪᓐᓇᓂᕐᒥᑦ ᐊᒻᒪ ᓵᓚᒃᓴᕋᓱᖕᓂᕐᒧᑦ ᒪᓕᒐᐃᑦ ᐊᑐᐃᓐᓇᐅᔪᑦ ᓄᓇᕗᑦ ᒐᕙᒪᒃᑯᑦ ᐃᑭᐊᖅᑭᕕᖓᓂᑦ.
ᖁᔭᓐᓇᒦᒃ.