ᐃᖃᓗᐃᑦ, ᓄᓇᕗᑦ (ᒫᑦᓯ 11, 2025) – ᓄᓇᕗᑦ ᒐᕙᒪᖓᑕ ᐃᓕᓐᓂᐊᕐᓂᓕᕆᔨᒃᑯᖏᑦ ᖁᕕᐊᓱᒃᐳᑦ ᐅᖃᐅᓯᖃᕆᐊᒃᓴᖅ ᑕᓪᓕᒪᓄᑦ ᐅᑭᐅᓄᑦ ᐅᖓᕙᕆᐊᖅᑎᑕᐅᓂᖓᓂᒃ ᒐᕙᒪᑐᖃᒃᑯᑦ ᐃᓕᓐᓂᐊᕆᐅᖅᓴᓕᓵᖅᑐᓄᑦ ᓄᑕᖅᑲᓪᓗ ᑲᒪᒋᔭᐅᕙᖕᓂᖏᓐᓄᑦ ᑮᓇᐅᔭᖃᖅᑎᑕᐅᓂᕐᒧᑦ ᐊᖏᖃᑎᒌᒍᑕᐅᓯᒪᔪᑦ ᑲᑎᖦᖢᒋᑦ $109.9 ᒥᓕᐊᓐ−ᖑᔪᑦ.
ᐅᖓᕙᕆᐊᖅᑕᐅᓂᖏᑦ ᑖᒃᑯᐊ ᑮᓇᐅᔭᖃᖅᑎᑦᑎᓂᕐᒧᑦ ᐊᖏᖃᑎᒌᒍᑕᐅᓯᒪᔪᑦ ᐃᑲᔪᖅᑐᐃᓂᐊᖅᐳᑦ ᑲᔪᓰᓐᓇᖅᑐᒥᒃ ᐊᑐᓕᖅᑎᑦᑎᕙᓪᓕᐊᓂᕐᒥᒃ ᐱᒻᒪᕆᐊᓗᖕᒧᑦ ᐃᓕᓐᓂᐊᕆᐅᖅᓴᓕᓵᖅᑐᓄᑦ ᓄᑕᖅᑲᓪᓗ ᑲᒪᒋᔭᐅᕙᖕᓂᖏᓐᓄᑦ (ELCC−ᑯᑦ) ᐱᒋᐊᖅᑕᐅᓯᒪᔪᓄᑦ:
• $10−ᐅᓪᓗᓕᒫᕐᒧᑦ ᐸᐃᕆᔭᐅᑎᑦᑎᓂᖅ ᐊᑭᑐᓗᐊᖁᓇᒍ.
• ᐃᓕᓐᓂᐊᓕᒻᒪᒃᓴᔪᓕᕆᕝᕕᑦ ᐸᐃᕆᕕᓪᓗ ᑮᓇᐅᔾᔭ ᐱᒻᒪᕆᐅᑎᒃᑲᓐᓂᕐᓗᒋᑦ ᓴᙱᒃᑎᒋᐊᕐᓗᒋᓪᓗ ᐃᖅᑲᓇᐃᔭᕐᕕᒋᔭᐅᔪᑦ.
• ᐃᓕᓐᓂᐊᓕᒻᒪᒃᓴᔪᓕᕆᕝᕕᖕᓄᑦ ᐸᐃᕆᕕᖕᓂᓪᓗ ᒪᑭᒪᔾᔪᑎᓄᑦ ᑮᓇᐅᔭᑦ ᐱᓕᕆᐊᑦ ᐱᔪᓐᓇᐅᑎᑖᒃᑲᓐᓂᖁᓪᓗᒋᑦ ᐱᔪᓐᓇᐅᑎᓖᑦ ᐸᐃᕆᕖᑦ.
• ᐃᑲᔪᖅᑐᐃᓐᓂᖅ ᐃᓚᓕᐅᔾᔨᓂᖅ ᐊᒻᒪ ᐊᔾᔨᒌᒃᑎᑦᑎᓂᖅ ᐃᓕᓐᓂᐊᓕᒻᒪᒃᓴᔪᓕᕆᕝᕕᑦ ᐸᐃᕆᕕᓪᓗ ᐱᓕᕆᐊᒃᓴᖏᓐᓂ.
• ᐃᑲᔪᖅᑐᕐᓗᒋᑦ ᐱᕙᓪᓕᐊᑎᑕᐅᔪᑦ ᐊᒻᒪ ᐱᓕᕆᐊᖑᓂᖏᑦ ᐱᐅᑦᑎᐊᖅᑐᑦ ᐃᓕᓐᓂᐊᓕᒻᒪᒃᓴᔪᓕᕆᕝᕕᑦ ᐸᐃᕆᕕᓪᓗ ᐱᓕᕆᐊᒃᓴᑦᑎᐊᕙᖕᓂᑦ ᐃᓕᓐᓂᐊᓕᒻᒪᒃᓴᔪᓕᕆᕝᕕᑦ ᐸᐃᕆᕕᓪᓗ ᐱᐅᓂᖏᓐᓄᑦ ᐋᖅᑭᒃᓯᒪᓂᖓ ᖃᓄᖅᑑᕈᑎᓄᑦ ᐸᕐᓇᐅᑎᑦ.
"ᑖᒃᑯᓇᙵᑦ ᑮᓇᐅᔭᓂᒃ ᐅᖓᕙᕆᐊᖅᑕᐅᑎᓪᓗᒍ, ᐃᓕᓐᓂᐊᕐᓂᓕᕆᔨᒃᑯᑦ ᐃᓂᖃᑦᑎᐊᖅᐳᑦ ᑲᔪᓯᑎᑦᑎᖃᑦᑕᐃᓐᓇᕈᓐᓇᖅᖢᑎᒃ ᐃᓕᓐᓂᐊᓕᒻᒪᒃᓴᔪᓕᕆᕝᕕᑦ ᐸᐃᕆᕕᓪᓗ ᐊᖏᕈᑎᒋᓯᒪᔭᖏᓐᓂᒃ, ᓴᙱᒃᑎᒋᐊᕐᓗᒍ ᐱᓕᕆᕝᕕᒃ, ᐃᖅᑲᓇᐃᔭᖅᑎᑦ ᐃᖏᕐᕋᓯᑦᑎᐊᖅᑎᓪᓗᒋᑦ, ᐊᒻᒪ ᐊᑭᑐᓗᐊᙱᑦᑐᓂᒃ ᐸᐃᕆᕕᖃᖅᑎᑦᑎᓂᖅ ᐃᓚᒌᓄᑦ ᓄᓇᕗᒻᒥ," ᐅᖃᓚᐅᖅᐳᖅ ᒥᓂᔅᑕ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐹᒥᓚ ᕼᐊᑯᖓᒃ ᒍᕌᔅ. "ᖁᔭᓕᓐᓇᒦᒃ ᐱᓕᕆᖃᑎᒋᕙᒃᑕᕗᑦ ᑲᓇᑕᐅᑉ ᒐᕙᒪᖓᓂ, ᑲᔪᓯᑎᑦᑎᔪᓐᓇᖅᐳᒍᑦ ᐃᒻᒪᓂᖅᓴᓂᑦ ᐊᒻᒪ ᐊᓯᔾᔨᖅᑕᖅᑐᓂᑦ, ᓇᓕᒧᒌᓕᖅᑎᑕᐅᓯᒪᔪᖅ ᑲᑐᔾᔨᓗᑕ ᐱᓕᕆᐊᒃᓴᓄᑦ ᐱᕈᖅᓴᐃᒃᑲᓐᓂᕐᓗᑕᓗ ᐃᓕᓐᓂᐊᕐᓂᓕᕆᓂᕐᒥᑦ.”
ᓄᑕᖅᑲᑦ ᐱᕈᖅᐸᓪᓕᐊᓂᖏᑦ ᐱᒻᒪᕆᐅᕗᖅ ᓄᑕᖅᑲᑦ ᐊᖅᑯᑎᑦᑎᐊᕙᖕᒧᑦ ᐃᓅᓯᖏᓐᓄᑦ, ᑐᙵᕕᓕᐅᕐᓗᑎᒃ ᐅᖃᓕᒫᕈᓐᓇᑦᑎᐊᕐᓂᕐᒧᑦ, ᐃᓅᖃᑎᒌᓄᑦ ᐊᒻᒪ ᐃᒃᐱᒋᔭᒃᑯᑦ ᐱᕈᖅᐸᓪᓕᐊᔪᓄᑦ, ᐊᒻᒪ ᖃᓄᐃᙱᑦᑎᐊᕈᓯᕐᒧᑦ, ᐊᒻᒪ ᐱᐅᔪᓂᒃ ᖃᐅᔨᖃᑦᑕᖅᓯᒪᔭᖏᓐᓂᒃ ᐱᓕᕆᖃᑎᒌᒃᐸᓪᓕᐊᓂᕐᒧᑦ. ᐃᓚᐅᖃᑕᐅᒋᑦ ᖁᕕᐊᓱᑎᖃᖅᑎᓪᓗᑕ ᐊᒻᒪ ᐃᓱᒪᒋᓗᒋᑦ ᐱᐅᔪᑦ ᐊᒃᑐᐃᓂᖃᖅᑐᑦ ᐃᓕᓐᓂᐊᕆᐅᖅᓴᔪᓕᕆᔨᒃᑯᑦ ᐸᐃᕆᕖᓪᓗ ᓄᑕᖅᑲᑦᑎᓐᓄᑦ ᓄᓇᓕᑦᑎᓐᓄᓗ.
ᑐᑭᓯᒋᐊᒃᑲᓐᓂᕈᒪᒍᕕᑦ, ᑕᑯᒋᐊᕈᓐᓇᖅᐳᑎᑦ ᐃᓕᓐᓂᐊᕐᓂᓕᕆᔨᒃᑯᑦ ᐃᓕᓐᓂᐊᓕᒻᒪᒃᓴᔪᓕᕆᕝᕕᒃ ᐸᐃᕆᕕᓪᓗ ᐃᑭᐊᖅᑭᕕᖓᓄᑦ.