ᐃᖃᓗᐃᑦ, ᓄᓇᕗᑦ (ᐊᒃᑐᐸ 11, 2024) − ᐱᔾᔪᑎᒋᓪᓗᒍ ᓄᓇᕗᑦ ᒐᕙᒪᒃᑯᑦ ᑲᑐᔾᔨᓗᑕ ᑐᕌᒐᖓᓐᓂ ᓯᕗᓪᓕᐅᑎᑕᐅᒍᒪᓯᒪᔪᖅ, ᐃᓐᓇᕈᖅᐸᓪᓕᐊᓂᖅ ᐅᐱᒍᓱᓪᓗᑎᒃ, ᓯᕗᓕᖅᑎ ᐱᔭᐃ ᐊᕿᐊᕈᖅ ᐅᓪᓗᒥ ᓇᓗᓇᐃᖅᓯᖅᑲᐅᔪᖅ ᑕᓪᓕᒪᓂ ᓄᓇᓕᓐᓂ ᐱᒡᒐᖅᑐᖅᓯᐅᑎᓂᒃ ᓄᓇᓯᐅᑎᑖᓛᕐᖓᑕ ᐅᑭᐊᑦᓵᖅ ᐃᓐᓇᒻᒪᕆᓐᓄᑦ ᐅᓯᒃᑲᑦᑕᐅᑎᐅᒍᓐᓇᕐᓂᐊᕐᓗᑎᒃ ᐊᑐᐃᓐᓇᖃᒃᑲᓐᓂᖁᓪᓗᒋᓪᓗ ᓄᓇᓕᓐᓂ ᒐᕙᒪᒃᑯᓐᓂᓗ ᐱᔨᑦᓯᕋᐅᑎᖏᓐᓄᑦ. ᑕᓪᓕᒪᑦ ᓄᓇᓖᑦ ᐃᖃᓗᐃᑦ, ᐃᖃᓗᑦᑑᑦᑎᐊᖅ, ᓴᓪᓕᖅ, ᐸᖕᓂᖅᑑᖅ, ᑲᖏᖅᖠᓂᕐᓗ.
“ᑐᓴᓚᐅᕋᑦᑕ ᐃᓐᓇᒻᒪᕆᓐᓂᒃ ᑐᑭᓯᑦᓯᐊᖅᑐᑕ: ᐊᑐᐃᓐᓇᖃᕈᒪᔪᑦ ᑕᑎᒋᒍᓐᓇᖅᑕᖏᓐᓂᒃ ᐃᖏᕐᕋᔾᔪᑎᓂᒃ ᐋᓐᓂᐊᕐᕕᓐᓂ ᑕᑯᔭᐅᕕᑦᓴᖃᖅᑎᓪᓗᒋᑦ, ᓂᐅᕕᕐᕕᒻᒨᕆᐊᖃᖅᑎᓪᓗᒋᑦ ᑲᑎᖃᑎᒌᑦᑐᓅᖃᑦᑕᕐᓗᑎᒃ ᐃᓱᒫᓘᑕᐅᖃᑦᑕᖅᓯᒪᒻᒪᑦ ᐊᑦᑐᐃᓂᖃᖅᓯᒪᓪᓗᓂ ᐃᓐᓇᒻᒪᕆᕈᖅᐸᓪᓕᐊᔪᓄᑦ ᓄᓇᕗᒻᒥᐅᓄᑦ,” ᐅᖃᖅᓯᒪᔪᖅ ᓯᕗᓕᖅᑎ ᐊᕿᐊᕈᖅ. “ᑖᒃᑯᐊ ᐅᓯᑲᑦᑕᐅᑏᑦ ᓄᓇᓯᐅᑏᑦ ᐊᑲᕐᕆᔮᓕᖅᐹᓪᓕᕈᑕᐅᓂᐊᖅᑐᑦ ᐃᓐᓇᒻᒪᕆᓐᓄᑦ ᐃᑭᕕᑦᓴᖃᕈᓐᓇᖅᓯᓗᑎᒃ ᐅᐸᒋᐊᓕᖏᓐᓄᑦ ᐊᑦᑕᓇᖏᑦᑐᒃᑯᑦ. ᓂᕆᐅᑦᓯᐊᖅᑐᖓᓗ ᐱᒋᐊᖅᑕᐅᓯᒪᔪᖅ ᓯᐊᕐᒪᖅᑕᐅᒃᑲᓐᓂᓛᕐᓂᖓᓂᒃ ᐊᓯᖏᓐᓄᑦ ᓄᓇᓕᓐᓄᑦ ᓄᓇᕗᒻᒥ.”
ᒪᐃ 2024-ᒥ, ᒐᕙᒪᓕᕆᔨᒃᑯᑦ ᑐᑦᓯᕋᓚᐅᖅᑐᑦ ᐱᔫᒥᓴᐅᑎᓂᒃ ᓄᓇᕗᒻᒥ, ᐊᕕᑦᑐᖅᓯᒪᓂᐅᔪᓂ ᓄᓇᓕᓐᓂᓘᓐᓃᑦ ᑲᑐᔾᔨᖃᑎᒌᓂᒃ ᐱᓕᕆᔾᔪᑎᑦᓴᖃᖅᑐᓂᒃ ᐱᔪᓐᓇᕐᓂᖃᖅᑐᓂᓪᓗ ᐊᐅᓚᑦᓯᒍᓐᓇᓂᕐᒧᑦ ᐃᓐᓇᒻᒪᕆᓐᓄᑦ ᓄᓇᓯᐅᑎᓂᒃ ᑕᓪᓕᒪᓂ ᓄᓇᓕᓐᓂ.
ᔫᓂ 2024 ᑐᓴᕆᐊᖅᑎᑕᐅᓚᐅᖅᑎᓪᓗᒋᑦ, ᓯᑕᒪᑦ ᑲᑐᔾᔨᖃᑎᒌᑦ ᑐᓂᓯᓚᐅᖅᑐᑦ ᐱᔫᒥᓵᕈᑎᓂᒃ. ᓂᕈᐊᖅᓯᓂᐊᖅᑐᓂᒃ ᑲᑎᒪᔨᕋᓛᓂᒃ ᐊᖏᔪᖅᑲᐅᑎᓂᒃ ᐃᖅᑲᓇᐃᔭᖅᑎᓂᒃ ᓂᕈᐊᖅᓯᓚᐅᖅᑐᑦ ᑲᑐᔾᔨᖃᑎᒌᓂᒃ ᐅᑭᐅᖅᑕᖅᑐᒥ ᐱᔪᓐᓇᕐᓂᖅᑖᖅᐸᓪᓕᐊᓂᕐᒧᑦ ᐱᕙᓪᓕᐊᑎᑦᓯᔨᓂᒃ, ᑲᑐᔾᔨᖃᑎᖃᖅᑐᓂᒃ Arctic Training Ltd ᐊᒻᒪᓗ Caribou Cabs ᑖᑦᓯᑎᒃᑯᑦ.
ᑕᓪᓕᒪᑦ ᑲᐃᓪᓗᐊᕈᑎᓕᓐᓄᑦ ᐱᒡᒐᖅᑐᖅᓯᐅᑎᐅᓪᓗᑎᒃ ᓄᓇᓯᐅᑎᓂᒃ ᑎᑭᓯᒪᔪᖃᓕᖅᑐᖅ, ᐅᕝᕙᓘᓐᓃᑦ ᑎᑭᓛᑐᐃᓐᓇᖅᑐᑦ, ᓄᓇᕗᒻᒧᑦ 2024 ᐅᒥᐊᕐᔪᐊᖃᕐᓇᒥ. ᓄᓇᓯᐅᑏᑦ ᒪᕐᕉᓐᓂᒃ ᐱᔾᔪᑎᖃᓗᐊᕐᓂᐊᖅᑐᑦ ᐊᑐᓂᑦ ᓄᓇᓕᓐᓂ, ᑕᒪᒃᑮᒃ ᐃᓐᓇᒻᒪᕆᓐᓄᑦ ᐅᓯᔭᐅᖃᑦᑕᕈᓐᓇᖁᓪᓗᒋᑦ ᓄᓇᓕᓐᓂᓗ ᐊᖁᒍᓐᓇᖅᑐᓂᒃ ᐃᓕᓐᓂᐊᖅᑎᑦᓯᕙᓪᓕᐊᓯᓐᓈᕐᓗᑎᒃ.