ᓯᕗᓕᖅᑎ ᐲᔾᔭᐃ ᐊᕿᐊᕈᖅ ᐅᑯᓂᖓ ᐅᖃᐅᓯᖃᓚᐅᖅᐳᖅ ᑭᐅᔾᔪᑎᖃᖅᖢᓂ ᑲᓇᑕᐅᑉ ᒐᕙᒪᒃᑯᖏᑦ ᒪᒥᐊᓐᓂᕆᓚᐅᖅᑕᖓᓄᑦ ᐃᓄᖕᓄᑦ ᐃᓚᒌᓄᑦ ᑕᓪᓗᕈᑎᒧᑦ ᓅᑎᑕᐅᓚᐅᖅᓯᒪᔪᓂᑦ ᐅᓪᓗᒥ ᑯᐃᑉ ᑭᒡᒐᖅᑐᖅᑎᖓ−ᓄᓇᖃᖅᑳᖅᓯᒪᔪᓕᕆᔨᓄᑦ ᐊᒻᒪᓗ ᐃᓄᓕᕆᔨᑐᖃᒃᑯᑦ ᑲᓇᑕᒥ ᒥᓂᔅᑕᖓ ᒋᐅᕆ ᐋᓐᑕᓴᖓᐃᔭ ᐃᒃᐱᐊᕐᔪᖕᒥ, ᓄᓇᕗᑦ:
"ᐃᓄᐃᑦ ᓄᒃᑎᖁᔭᐅᓚᐅᖅᓯᒪᔪᑦ ᐱᖁᔭᐅᓪᓗᑎᒃ ᑲᓇᑕᐅᑉ ᐊᐅᓚᑦᑎᔪᓐᓇᕐᓂᖓᓂ ᐊᒃᓱᐊᓗᒃ ᖁᕕᐊᓇᙱᑦᑐᒃᑰᕈᑕᐅᖃᑕᐅᓚᐅᕐᒪᑦ ᑕᐃᔅᓱᒪᓂ ᓄᓇᕗᒻᒥ. ᐃᖅᑲᐅᒪᔾᔪᑕᐅᓯᒪᔪᑦ ᖃᓄᐃᓕᐅᕐᓂᐅᓚᐅᖅᑐᓂᑦ ᑭᖑᕚᕇᓄᑦ ᖁᐊᖅᓵᕈᑕᐅᓯᒪᔪᑦ ᐊᒻᒪᓗ ᑕᑎᒌᖃᑦᑕᐅᑎᔪᓐᓇᐃᓪᓕᓪᓗᑎᒃ ᑲᓇᑕᒥ ᐊᒻᒪ ᐃᓄᐃᑦ ᐃᓄᖏᑦ.
ᐅᐱᒋᔪᒪᕙᒃᑲ ᑕᓪᓗᕈᑎᒧᑦ ᓅᑎᑕᐅᓚᐅᖅᑐᓄᑦ ᑲᑐᔾᔨᖃᑎᒌᑦ ᐃᑲᔪᖅᑐᐃᑦᑎᐊᓚᐅᕐᓂᖏᓐᓄᑦ ᑕᒪᑐᒥᖓ ᐱᔾᔪᑎᖃᖅᖢᑎᒃ ᐃᓚᒌᓄᑦ ᐊᓂᒍᐃᓯᒪᔪᓄᓪᓗ ᑕᓪᓗᕈᑎᒧᑦ ᓄᒃᑎᖅᑕᐅᓚᐅᖅᑐᓄᑦ.
1934-ᒥ, ᐊᐃᔪ, ᐃᕐᓂᖏᑦ ᑭᒍᑦᑕᖅ, ᓴᐸ, ᖃᕙᕙᐅᖅ, ᓇᐸᓯᑲᓪᓚᒃ ᐸᓂᖓᓗ ᐃᑎᓪᓗᐃ ᓅᑎᑕᐅᓚᐅᖅᓯᒪᔪᑦ ᑭᙵᕐᓂᑦ ᑕᓪᓗᕈᑎᒧᑦ ᐃᓗᕕᐊᓗᒃᑕᓕᖕᒥᑦ, 1,000 ᑭᓛᒥᑕ ᐅᖓᑖᓂ ᐅᖓᓯᖕᓂᓕᖕᒥᑦ. ᐅᑎᕐᓂᐊᕐᓂᕋᖅᑕᐅᒐᓗᐊᖅᑎᓪᓗᒋᑦ ᐊᕐᕌᒎᒃ ᒪᕐᕉᒃ ᐊᓂᒍᖅᐸᑦ, ᐃᓚᒌᑦ ᓅᑎᑕᐅᒃᑲᓐᓂᓕᓚᐅᖅᑐᑦ ᐱᖓᓱᐃᖅᓱᒃᑲᓐᓂᖅᖢᑎᒃ ᐃᑉᐱᐊᕐᔪᖕᒧᑦ, ᕗᐊᑦ ᕌᔅᒧᑦ ᑕᓗᕐᔪᐊᕐᒧᓪᓗ.
ᐅᓄᖅᑐᑦ ᓅᑕᐅᓯᒪᔪᑦ ᐃᓄᐃᑦ ᐃᓅᔪᓐᓃᕋᓗᐊᖅᑎᓪᓗᒋᑦ, ᐅᓪᓗᒥ ᒪᒥᐊᓐᓂᖅ ᓲᖃᐃᒻᒪ ᐱᒻᒪᕆᐅᓂᐊᖅᑐᖅ ᒪᒥᓴᖅᐸᓪᓕᐊᓕᕐᓗᑎᒃ ᐃᓱᒪᒋᔪᓐᓇᐃᖃᑎᒌᒡᓗᑎᒡᓗ.
ᑎᓕᐅᒃᑲᓐᓂᕈᒪᕙᒃᑲ ᑲᓇᑕᒥᐅᓕᒫᑦ ᐃᖅᑲᐅᒪᖁᓪᓗᒋᑦ ᑐᓐᓂᖅᑯᑎᒋᓯᒪᔭᖏᓐᓂᒃ ᐃᓄᐃᑦ ᐅᑭᐅᖅᑕᖅᑐᒥ ᐊᐅᓚᑦᑎᔪᓐᓇᕐᓂᖏᓐᓂ ᐱᖁᔭᐅᓪᓗᑎᒃ. ᐃᓕᓐᓂᐊᖅᑎᓪᓗᑎᒍᑦ ᕿᑐᕐᖓᕗᑦ ᓱᓕᔪᓂᑦ ᑲᓇᑕᒥ ᐊᓂᒍᖅᓯᒪᔭᑦᑎᓐᓂ ᐱᒻᒪᕆᐅᕗᖅ ᓱᓕᔪᒥᑦ ᒪᒥᓴᖁᓪᓗᒋᑦ ᐃᓱᒪᒋᔪᓐᓇᐃᖃᑎᒌᖁᓪᓗᒋᓪᓗ ᓄᓇᑦᑎᓐᓂ.
ᓱᓕᒃᑲᓐᓂᖅ, ᖁᔭᓕᔪᒪᕙᒃᑲ ᐃᓄᐃᑦ ᐊᒃᓱᕈᓚᐅᖅᑐᑦ ᐊᕐᕌᒍᒐᓴᖕᓄᑦ ᑎᑭᐅᑎᓇᓱᒃᖢᑎᒃ ᑖᔅᓱᒥᖓ ᐃᖅᑲᐅᒪᔭᑐᖃᕐᒥᒃ − ᓴᙱᓃᑦ, ᓴᐱᓕᖅᓴᕋᐃᙱᓐᓃᑦ ᐊᖏᖅᓯᒪᓃᓪᓗ ᑖᔅᓱᒧᖓ ᐱᔾᔪᑎᒧᑦ ᐃᖅᑲᐅᒪᔭᐅᖏᓐᓇᕐᓂᐊᖅᑐᖅ."