ᐃᖃᓗᐃᑦ, ᓄᓇᕗᑦ (ᒪᐃ 31, 2024) − ᐅᓪᓗᒥ ᒥᓂᔅᑕ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᑕᐃᕕᑎ ᐊᕿᐊᕈᖅ ᑐᓴᖅᑎᑦᑎᖅᑲᐅᕗᖅ ᑮᓇᐅᔭᓕᐊᖏᑦ ᐅᔾᔨᕐᓇᖅᑐᒥᒃ ᐃᓚᒋᐊᖅᑕᐅᓂᐊᕐᒪᑕ ᐅᓄᕐᓂᖅᓴᐃᑦ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᐊᒃᑐᖅᑕᐅᓂᐊᖅᖢᑎᒃ.
ᓯᑎᐱᕆ 30, 2024−ᒥ ᐊᑐᓯᒋᐊᕐᓗᓂ, ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓂ, ᑭᑭᑕᐅᓯᒪᔪᑦ ᐊᒻᒪ ᐊᐅᓚᑦᑎᔨᒻᒪᕆᐅᖃᑎᒌᑦ 9% ᑮᓇᐅᔾᔭᒃᓵᖏᑦ ᐃᓚᒋᐊᖅᑕᐅᓂᐊᖅᐳᑦ. ᐊᒻᒪ ᓱᓕ, 2−ᐳᓴᓐᑲᓐᓂᕐᓂᒃ ᐃᓚᔭᐅᓂᐊᖅᑐᑦ ᐊᐅᓚᑦᑎᔨᒻᒪᕆᐅᓂᖅᓴᑦ ᐊᒻᒪ ᐱᑐᐃᓐᓇᐅᖏᓐᓂᖅᓴᓂᑦ ᐃᖅᑲᓇᐃᔮᓕᑦ (ᑮᓇᐅᔾᔭᒃᓵᖏᑦ ᐊᔾᔨᒌᙱᓐᓂᖏᑦ 18−25) ᐱᔪᓐᓇᖁᓪᓗᒋᑦ ᐃᖅᑲᓇᐃᔮᒃᓴᓄᑦ ᐱᕙᓪᓕᐊᓂᐅᔪᓂᑦ ᐊᒻᒪ ᑲᔪᖏᖅᓴᐃᓂᕐᒥᑦ ᐃᖅᑲᓇᐃᔭᖅᑎᓄᑦ ᑲᒪᒋᔭᖃᕈᓐᓇᖁᓪᓗᒋᑦ ᐱᓕᕆᐊᒃᓴᒃᑲᓐᓂᖏᓐᓂᒃ.
“ᐃᓚᒋᐊᖅᑕᐅᔪᑦ ᑮᓇᐅᔭᒃᓵᖏᑦ ᐊᖏᔪᒻᒪᕆᐅᕗᑦ ᐊᒻᒪ ᓄᓇᕗᑦ ᒐᕙᒪᒃᑯᓐᓂ ᐱᓇᔪᒡᕕᐅᔪᓐᓇᑦᑎᐊᕐᓂᐊᖅᖢᓂ ᐃᖅᑲᓇᐃᔭᕐᕕᐅᓪᓗᓂ," ᒥᓂᔅᑕ ᑕᐃᕕᑎ ᐊᕿᐊᕈᖅ ᐅᖃᖅᑐᖅ. “ᑖᓐᓇ ᐃᑲᔫᑕᐅᓂᐊᖅᑐᖅ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖃᐃᓐᓇᖁᓪᓗᒋᑦ ᐊᒻᒪ ᐱᔪᒃᓯᓂᖅᓴᐅᓕᕐᓗᑎᒃ ᐊᔪᙱᓐᓂᓖᑦ, ᓄᓇᓕᖕᓂᑦ ᑮᓇᐅᔭᓕᐅᕐᓂᖅᓴᐅᓕᕐᓗᑎᒃ ᐃᑲᔪᖅᑐᐃᓗᑎᒡᓗ ᓄᓇᕗᒻᒥᐅᓂᑦ ᐃᓚᒌᓂᑦ.”
"ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᖁᕕᐊᓱᒃᑐᑦ ᓄᓇᕗᑦ ᒐᕙᒪᒃᑯᑦ ᐱᓕᕆᐊᖃᖅᐸᓪᓕᐊᓕᕐᒪᑕ ᖃᐅᔨᒪᔭᐅᔪᓂᒃ ᑮᓇᐅᔾᔭᒃᓵᖏᓐᓂ ᐱᑕᖃᙱᓐᓂᖏᓐᓂᒃ. ᓂᕆᐅᒃᐳᒍᑦ ᐱᓕᕆᖃᑎᖃᕈᒪᓪᓗᑕ ᓄᓇᕗᑦ ᒐᕙᒪᒃᑯᓐᓂ ᓯᕗᓂᒃᓴᑦᑎᓐᓂ ᐋᔩᖃᑎᒌᒡᓗᑕ ᑭᖑᕙᓯᒃᑲᓐᓂᖁᙱᖦᖢᒋᑦ," ᑕᐃᒪᓐᓇ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦᑕ ᐊᖓᔪᖅᑳᖓᑦ ᔭᐃᓴᓐ ᕉᓴᓐ ᐅᖃᖅᑐᖅ.
ᑮᓇᐅᔾᔭᒃᓵᖏᑦ ᐃᓚᒋᐊᖅᑕᐅᓚᐅᖅᐳᑦ ᖃᖓᑦᑎᐊᖅ ᐊᑭᓕᖅᑕᐅᔾᔪᑎᑦ ᕿᒥᕐᕈᔭᐅᓚᐅᖅᑎᓪᓗᒋᑦ ᓇᓗᓇᐃᖅᓯᓪᓗᑎᒃ ᑮᓇᐅᔾᔭᒃᓵᓄᑦ ᐱᑕᖃᙱᓐᓂᐅᔪᑦ ᐊᒻᒪ ᐋᖅᑭᒃᓯᒪᓂᖓ ᐊᓯᔾᔨᕐᓂᖓᓂᒃ. ᕿᒥᕐᕈᔭᐅᔪᖅ ᐃᓚᓕᐅᔾᔭᐅᓪᓗᓂ ᐱᒋᐊᕈᑎᖓ ᑲᓇᑕᓕᒫᒥ ᐊᒻᒪ ᓄᓇᕗᒻᒥ. ᐱᓕᕆᐊᖑᔪᖅ ᐱᒋᐊᖅᑎᑕᐅᓯᒪᔪᖅ ᐃᖅᑲᓇᐃᔭᖅᑐᓕᕆᔨᒃᑯᓐᓂᑦ ᑲᑐᔾᔨᖃᑎᖃᖅᖢᑎᒃ ᑮᓇᐅᔭᓕᕆᔨᒃᑯᓐᓂᑦ.