ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᔪᖓ ᐅᖃᐅᓯᖃᕈᒪᓪᓗᖓ ᐃᓅᖃᑎᒌᖏᓐᓄᑦ ᑲᑉᐱᐊᓇᖅᑐᒦᓐᓂᖏᓐᓄᑦ ᔪᑯᕋᐃᓐᒥ.
ᐅᓛᓵᒃᑯᑦ ᐱᔾᔪᑎᖃᕋᑎᒃ ᐅᓇᑕᕆᐊᓕᓚᐅᕐᖓᑕ ᔪᑯᕋᐃᓐᒥᒃ ᑲᑉᐱᐊᓇᕈᑕᐅᓕᖅᑐᓂᓗ ᓄᓇᕐᔪᐊᖅ ᐅᓗᕆᐊᓇᖅᑐᒦᒍᑎᖃᕐᓂᖓᓂᒃ, ᓱᕐᕋᑦᑕᐅᒍᓐᓇᕐᓂᖓᓂᒃ ᐅᑭᐅᖅᑕᖅᑐᒥ ᓄᓇᓕᖏᓐᓂᒃ ᑲᔪᓯᒍᑕᐅᒍᓐᓇᕐᓂᖓᓄᓪᓗ ᐅᑭᐅᖅᑕᖅᑐᒥ ᐱᓕᕆᖃᑎᒌᖃᑦᑕᕐᓂᖅ.
ᓄᓇᕗᑦ ᐊᑭᕋᖅᑐᖅᑐᖅ ᑕᒪᑐᒥᖓ ᐱᔾᔪᑎᖃᙱᑦᑐᒥᒃ ᓯᖁᒥᑦᓯᓂᐅᓯᒪᔪᒥᒃ ᓄᓇᕐᔪᐊᒥ ᒪᓕᒐᖏᓐᓂᒃ ᐃᑲᔪᖅᓱᐃᓪᓗᑎᓪᓗ ᓴᙱᔪᒥᒃ ᐊᕝᕕᐊᕈᑎᓕᐅᕋᓱᐊᕐᓂᖏᓐᓂᒃ ᑲᓇᑕ ᐅᓛᓵᕐᒥᐅᓄᑦ.
ᐅᖃᖅᑎᑦᑎᔩ, ᓇᖏᖃᑎᒋᕙᒃᑲ ᐊᑕᐅᓯᐅᖃᑎᒋᓪᓗᒋᑦ ᓯᕗᓕᖅᑎᖏᒃ ᔫᑳᓐᒥ ᓄᓇᑦᓯᐊᕐᒥᓗ ᐃᓱᒫᓘᑎᖃᕐᓂᕋᖅᓯᒪᑎᓪᓗᒋᒃ ᐅᑭᐅᖅᑕᖅᑐᖅ ᓴᐳᒻᒥᔭᐅᒋᐊᖃᕐᓂᖓᓂᒃ ᐅᐊᑦᓯᔭᐅᒋᐊᖃᕐᓂᖓᓂᓪᓗ. ᐅᓛᓵᒃᑯᑦ ᐅᓇᑕᕐᓂᕆᔭᖏᑦ ᐊᑦᑐᐃᓂᖃᕐᓂᐅᓴᑐᐃᓐᓇᖅᑐᖅ ᐅᑭᐅᖅᑕᖅᑐᒥ ᖃᓄᐃᓕᐅᕈᑕᐅᔪᓂᒃ ᐅᓗᕆᐊᓇᖅᑐᒦᒍᑕᐅᓂᖓᓂᓪᓗ ᐊᑑᑎᖃᑦᓯᐊᖅᑐᓂᒃ ᑎᒥᐅᔪᓂᒃ ᓲᕐᓗ ᐅᑭᐅᖅᑕᖅᑐᒥ ᑲᑎᒪᔨᖏᓐᓂᒃ.
ᐅᑭᐅᖅᑕᖅᑐᒥ ᓯᕗᓕᖅᑎᐅᓪᓗᑕ ᑐᑦᓯᕋᖅᓯᒪᔪᒍᑦ ᓯᕗᓕᖅᑎᓄᑦ ᑲᓇᑕᓕᒫᒥ ᐊᒻᒪᓗ ᐊᖏᔪᖅᑳᕐᔪᐊᒧᑦ ᑲᒪᖃᑕᐅᖁᓪᓗᒋᑦ ᖃᓄᖅᑑᖃᑕᐅᓯᒪᓂᒃᑯᑦ ᐃᑲᔪᖃᑕᐅᖁᓪᓗᒋᑦ ᓵᖓᔭᐅᑎᓪᓗᑕ ᓄᓇᕐᔪᐊᒥ ᑲᑉᐱᐊᓇᖅᑐᒃᑰᕈᑎᒋᔭᑦᑎᓐᓂᒃ.
ᐅᖃᖅᑎᑦᑎᔩ, ᐃᑲᔪᖅᑕᐅᖁᓪᓗᒋᑦ ᔪᑯᕋᐃᓐᒥᐅᑦ ᒐᕙᒪᒋᔭᕗᑦ ᐃᑲᔫᑎᖃᕈᒪᓯᒪᔪᑦ $25,000-ᓂᒃ Red Cross-ᑯᓐᓄᑦ ᐃᑲᔫᑕᐅᒐᔭᕐᓗᑎᒃ ᐃᓅᖃᑎᒌᖏᓐᓄᑦ ᑐᐊᕕᕐᓇᖅᑐᒃᑰᕈᑎᖃᕐᓂᖏᓐᓄᑦ.
ᓄᓇᕗᑦ ᓇᖏᖃᑎᖃᖅᑐᑦ ᔪᑯᕋᐃᓐᒥᐅᑕᕐᓂᒃ ᔪᑯᕋᐃᓐᒥ ᓄᓇᕐᔪᐊᓕᒫᒥᓗ.
ᖁᔭᓐᓇᒦᒃ, ᐅᖃᖅᑎᑦᑎᔩ.