Kimmirut, Nunavut (Qiqaijalirvia 14, 2025) – Nunavut Kavamanga (GN) quviahuktut tuhaqtittiumaplutik ilitaqhidjutaa angmaktirutaa Kimmirut Milviup Igluqpaa, hamna an’nginiqaqtuq iniktirutaa an’ngiqlijuummiqhugu nutaangguqtiqhugulu Nunavutim milvia aulapkaidjutainni.
Kimmirut Milviup Igluqpaa hivulliujuq siksinit nutaaq-piniktuq igluqpait nappaktaujuq ihuarhijuummigutiqhainnut Nunavutim milviliqidjutait. Hapkua nutaangguqtiqhimajut ublumimun milviup igluqpait tunihijut iniqarnikkut, ihuaqtut, ihuaqtutlu tamajait naammagijauplutik tamainnut milvingmi atujuktunut.
Pivalliajuliqiijitkut In’ngilrajuliqiijitkutlu Ministaa David Akeeagok ilauqataujuq nunallaangmiutanit, paatnait, kavamanilu havaktiit ublumi angmaktigutaatigut katimaplutik nunallaamilu niripkaiplutik quviahuutigiplugu una tikiutiviqhaq.
"Kimmirut hivuliujuq siksini milviup igluqpainni nappaktaujuq ataani kavamatkut hivuliqtiinnit, quviagikpiaqtatkalu havaanggit takunnagutingmata”, uqaqtuq Minista Akeeagok. “Quanaqqut paatnavut Havagvianni Nunalingni Kavamatkunnilu Kivraqtuqtiit In’ngilrajuliqiijitkutlu Kanata ikajuqpangmata. Talvalluaqlu, qujagijatka Kimmirunmiut quviahuutigingmagu una tikiutiviqhaq – una igluqpak piutigijaqhi, ilihimajun’ngalu kivraqtuutauniaqtuq nunallaamun nakuujumik amigaittuni atuqtaqhani ukiuni”.
“Ublumi ilitaqhidjutiqaqtuq tikiutiviqhamik inungnut Kimmirunmi angmaktigutigaptigu nutaaq miliup igluqpaani”, uqaqtuq Nunalingni Kavamatkunnilu Piviqhaqautikkut Minista David Joanasie, MLA Hivugaani Qikiqtaaluk. "Una nutaaq igluqpak kivraqtuutihun’ngujuq nunaqatimnut amigaittuni ukiuni. Tun’ngahungnaktuq havagviga havakpiaqpangmata havaamingni pikpiagutijaami”.
“Ikajuutigiplugu in’ngilraviliqidjutinut aulapkaidjutait, taapkuatut Kimmirut Milviup Igluqpaatigut, kavamavut ikajuutijut aqhuuqhaiplutik maniliurnirmun, piliurhunilu nutaanik havaaqhanik, imaalu pijaami an’ngijuamik atadjutiqarnirmik Ukiutaqturmiutanut”, uqaqtuq kavamatuqainni In’ngilrajuliqiijitkutigun Iluanilu Himmauhirnikkut Minista Anita Anand.
Maliqhugu Kimmirut, nutaat milviup igluqpait Igluligaarjungmi, Naujaat, Tikirarjuaq, Kugluktuk, Kangiqlinirmilu piniaqhimaliktut aulapkaidjutiqhani tamaani upin’ngaqhami aujamilu 2025 mi.