ᑭᒻᒥᕈᑦ, ᓄᓇᕗᑦ (ᒫᑦᓯ 14, 2025) − ᓄᓇᕗᑦ ᒐᕙᒪᒃᑯᑦ (GN) ᐅᐱᒍᑦᑎᐊᖅᐳᑦ ᑐᓴᖅᑎᑦᑎᔪᓐᓇᕐᒪᑕ ᑖᓐᓇ ᒪᑐᐃᖅᑕᐅᔪᓐᓇᖅᓯᒻᒪᑦ ᑭᒻᒥᕈᒻᒥᑦ ᒥᑦᑕᕐᕕᖓᑕ ᐅᑕᖅᑭᕕᑦᑖᖓ, ᑖᓐᓇ ᓇᓗᓇᐃᒃᑯᑕᐅᔪᖅ ᐱᓕᕆᐊᖑᓯᒪᔪᓂᑦ ᑕᒪᒃᑯᐊ ᐱᔭᕇᖅᑕᐅᓂᖓᓄᑦ ᐱᒻᒪᕆᐅᔪᑦ ᐊᖏᓪᓕᒋᐊᖅᑎᑦᑎᓂᕐᒥᑦ ᐊᒻᒪᓗ ᓄᑕᐅᔾᔨᖅᑎᕆᑦᑎᓪᓗᒋᑦ ᓄᓇᕗᒻᒥ ᒥᑦᑕᕐᕕᓐᓂᑦ ᐱᖁᑎᕐᔪᐊᖁᑎᒋᔭᖏᓐᓂᑦ.
ᑭᒻᒥᕆᕐᒥᑦ ᒥᑦᑕᕐᕕᖓᑕ ᐅᑕᖅᑭᕕᖓ ᓯᕗᓪᓕᖅᐹᖑᓪᓗᓂ ᐱᔭᕇᖅᑕᐅᔪᖅ ᐱᖓᓲᔪᑦᑑᒻᒪᑕ ᓴᓇᔭᐅᔪᔅᓴᑦ ᓄᑖᖑᓂᖅᐸᐅᔪᓂᑦ ᐃᓪᓗᓂᑦ ᓄᓇᕗᒻᒥ ᒥᑦᑕᕐᕕᖏᓐᓂᑦ ᓴᓇᔭᐅᔪᓂᑦ ᐱᐅᓯᒋᐊᖅᑎᑦᑎᒍᑕᐅᓪᓗᓂ. ᑖᒃᑯᐊ ᓄᑖᖑᓂᖅᓴᐅᔪᑦ ᐅᑕᖅᑭᕕᐅᔪᑦ ᓂᕈᑐᓂᖅᓴᐅᒻᒪᑕ ᐃᓂᖃᑦᑎᐊᕐᓂᖅᓴᐅᓂᐊᖅᑐᑦ, ᐊᑲᕐᕆᓇᕐᓂᖅᓴᐅᓪᓗᓂ, ᐊᒻᒪᓗ ᐋᖅᑭᑦᑎᐊᓯᒪᓂᖅᓴᐅᔪᑦ ᐃᑲᔫᑎᖃᕈᓐᓇᖁᓪᓗᒍ ᐊᑐᖃᑦᑕᕐᓂᐊᖅᑐᒥᑦ ᑖᔅᓱᒥᖓ ᐅᑕᖅᑭᕕᒻᒥ.
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐱᓕᕆᕝᕕᖓᑕ ᒥᓂᔅᑕᖓ ᑕᐃᕕᑎ ᐊᕿᐊᕈᖅ ᐃᓚᒋᔭᐅᓪᓗᓂ ᓄᓇᓕᓐᓄᑦ, ᐱᓕᕆᖃᑕᐅᔪᓄᑦ, ᐊᒻᒪᓗ ᒐᕙᒪᒃᑯᓐᓄᑦ ᐱᓕᕆᔨᖏᓐᓄᑦ ᐅᓪᓗᒥ ᒪᑐᐃᖅᓯᓂᖃᖅᑎᓪᓗᒋᑦ ᐊᒻᒪᓗ ᓄᓇᓖᑦ ᓂᕆᕕᔾᔪᐊᖅᑎᑕᐅᓗᑎᑦ ᑖᔅᓱᒥᖓ ᖁᕕᐊᓲᑎᖃᕐᓂᕐᒧᑦ ᐱᔭᕇᖅᑕᐅᔪᓐᓇᖅᓯᓯᒪᓂᖓᓄᑦ.
“ᑭᒻᒥᕈᑦ ᓯᕗᓪᓕᖅᐹᖑᔪᖅ ᐱᖓᓲᔪᖅᑐᐃᑦ ᒥᑦᑕᕐᕕᒻᒥ ᐅᑕᖅᑭᕕᓕᐊᖑᓂᐊᖅᑐᓂᑦ ᑖᒃᑯᑎᒎᓇ ᒫᓐᓇ ᒐᕙᒪᒃᑯᓐᓂᑦ ᓯᕗᓕᖅᑎᒋᔭᐅᔪᑎᒍᑦ, ᐊᒻᒪᓗ ᐅᐱᒍᓱᑦᑎᐊᖅᕗᖓ ᐱᓕᕆᐊᖑᓯᒪᓂᕆᔭᖓ ᐱᓪᓗᒍ ᑖᓐᓇ ᐅᓪᓗᒥ ᑕᑯᔪᓐᓇᖅᓯᒐᑦᑎᒍ,” ᐅᖃᖅᑐᖅ ᒥᓂᔅᑕ ᐊᕿᐊᕈᖅ. “ᖁᔭᒋᕙᒃᑲ ᐱᓕᕆᖃᑎᒋᒍᓐᓇᓚᐅᕋᑦᑎᒍᑦ ᑖᒃᑯᐊ ᓄᓇᓕᓐᓂ ᒐᕙᒪᒃᑯᓂᓪᓗ ᐱᔨᑦᓯᕋᖅᑎᒃᑯᑦ ᐱᓕᕆᕝᕕᖓ ᐊᒻᒪᓗ ᑲᓇᑕᒥ ᐃᖏᕐᕋᔪᓕᕆᔨᒃᑯᖏᑦ ᐃᑲᔪᓚᐅᕐᒪᑕ. ᐱᓗᐊᖅᑐᒥᓪᓗ, ᖁᔭᒋᕙᒃᑲ ᑭᒻᒥᕈᕐᒥᐅᑦ ᐅᓪᓗᒥ ᖁᕕᐊᓲᑎᖃᖃᑕᐅᔪᓐᓇᕐᒪᑕ ᑖᔅᓱᒧᖓ ᑎᑭᐅᑎᔪᓐᓇᖅᓯᒪᔭᑦᑎᓐᓄᑦ − ᑖᓐᓇ ᐱᑖᕆᔭᓯ ᐃᓪᓗᒃ, ᐊᒻᒪᓗ ᖃᐅᔨᒪᔪᖓ ᐊᑐᖅᑕᐅᓂᐊᖏᓐᓇᕐᓂᐊᖅᑐᖅ ᐊᒥᓱᓄᑦ ᐊᕐᕌᒍᓄᑦ”.
“ᐅᓪᓗᒥ ᑎᑭᐅᑎᒐᑦᑕ ᓇᓗᓇᐃᒃᑯᑕᐅᔪᒧᑦ ᑖᓐᓇ ᐱᓕᕆᐊᖑᓯᒪᔪᖅ ᐱᔭᕇᖅᑕᐅᔪᓐᓇᕐᓂᖓᓄᑦ ᑭᒻᒥᕈᕐᒥᐅᓄᑦ ᒪᑐᐃᖅᑕᐅᑎᓪᓗᒍ ᓄᑖᖅ ᒥᑦᑕᕐᕕᒻᒥᑦ ᐅᑕᖅᑭᕕᑦᑖᖓ,” ᐅᖃᖅᑐᖅᑐ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᐱᓕᕆᕝᕕᖓᑕ ᒥᓂᔅᑕᖓ ᑕᐃᕕᑎ ᔪᐊᓇᓯ, ᒪᓕᒐᓕᐅᖅᑎ ᕿᑭᖅᑖᓘᑉ ᓂᒋᐊᓄᑦ. “ᑖᓐᓇ ᓄᑖᖑᓪᓗᓂ ᐃᓪᓗᒃ ᓂᕈᐊᖅᑎᒋᓯᒪᔭᓐᓂᑦ ᐱᔨᑦᑎᕋᕈᑕᐅᓂᐊᖅᑐᖅ ᐊᒥᓱᓄᑦ ᐊᕐᕌᒍᓄᑦ ᐊᑐᕐᓂᐊᖅᑕᑦᑎᓐᓄᑦ. ᐅᐱᒍᓱᓐᓇᑦᑎᐊᖅᑐᖅ ᐱᓕᕆᕝᕕᒋᔭᕋ ᐱᒻᒪᕆᐊᓗᓐᓂᑦ ᑲᒪᒍᓐᓇᓚᐅᕐᒪᑕ ᑖᓐᓇ ᑲᔪᓯᔪᓐᓇᖅᑎᑕᐅᖁᓪᓗᒍ.”
“ᐃᖏᕐᕋᔪᓕᕆᓂᕐᒧᑦ ᐱᖁᑎᕐᔪᐊᖅᑖᖅᑎᑦᑎᓂᒃᑯᑦ, ᑖᓐᓇᑐᑦ ᑭᒻᒥᕈᕐᒥᑦ ᒥᑦᑕᕐᕕᖓᑕ ᐅᑕᖅᑭᕕᖓ, ᒐᕙᒪᒋᔭᕗᑦ ᐃᑲᔪᖅᑐᐃᔪᑦ ᐊᒻᒪᓗ ᑮᓇᐅᔭᓕᐅᕋᓱᐊᕐᓂᕐᒥᑦ ᐱᕚᓪᓕᑎᑦᑎᒍᑕᐅᔪᖅ, ᓄᑖᓂᑦ ᐃᖅᑲᓇᐃᔮᔅᓴᖅᑖᖅᑎᑦᑎᒍᑕᐅᓪᓗᓂ, ᐊᒻᒪᓗ ᐅᑭᐅᑎᖅᑕᖅᑐᒥᐅᑦ ᑲᓱᕆᐊᒃᑲᓐᓂᖅᓯᒪᒍᓐᓇᖅᓯᖁᓪᓗᒋᑦ, ᐅᖃᖅᑐᖅ ᑲᓇᑕᒥ ᐃᖏᕐᕋᔪᓕᕆᔨᒃᑯᑦ ᐊᒻᒪᓗ ᑕᐅᖅᓰᖃᑎᒌᓐᓂᖅ ᑲᓇᑕᒥ ᒥᓂᔅᑕᖓ ᐊᓃᑕ ᐊᓈᓐᑦ.
ᑖᒃᑯᐊ ᑭᖑᕐᖓᒍᑦ ᑭᒻᒥᕈᕐᒥᐅᑦ, ᓄᑖᕐᒥᑦ ᓴᓇᕕᐅᓛᓕᕐᒥᔪᑦ ᐃᒡᓘᓕᒑᕐᔪᒻᒥᐅᑦ, ᓇᐅᔮᓂ, ᑎᑭᕋᕐᔪᐊᒥᐅᑦ, ᖁᕐᓗᖅᑑᕐᒥ, ᐊᒻᒪᓗ ᑲᖏᖅᖠᓂᕐᒥᓪᓗ ᑖᒃᑯᐊᓗ ᐱᒋᐊᖅᑕᐅᓛᖅᑐᖅ ᐅᐱᕐᖔᖑᓕᖅᐸᑦ ᐊᐅᔭᖓᓐᓂᓪᓗ 2025-ᒥ.