ᑲᖏᖅᖠᓂᖅ, ᓄᓇᕗᑦ (ᔭᓄᐊᕆ 14, 2024) – ᐅᓪᓗᒥ, ᓄᓇᕗᑦ ᒐᕙᒪᒃᑯᑦ ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᔮᓐ ᒪᐃᓐ ᐊᒻᒪ ᒥᓂᔅᑕ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓄᑦ ᑕᐃᕕᑦ ᔪᐊᓇᓯ, ᐱᓕᕆᖃᑎᖃᖅᖢᑎᒃ ᓴᒃᑯᒃᑯᑦ ᑮᓇᐅᔭᓕᐅᕋᓱᐊᕐᕕᖓᑕ ᐊᖓᔪᖅᑳᖓᓐᓂᑦ ᑕᐃᕕᑦ ᖃᑯᖅᑎᓐᓂᕐᒥᑦ, ᐅᐱᒍᓱᒃᖢᑎᒃ ᑐᓴᖅᑎᑦᑎᖅᑲᐅᕗᑦ ᓴᓇᔭᐅᕌᓂᒃᓯᒪᓕᕐᓂᖓᓂᑦ ᑭᕙᓪᓕᕐᒥ ᐊᑯᓂᐅᔪᒃᑯᑦ ᑲᒪᒋᔭᐅᖏᓐᓇᖅᑐᒃᑯᕕᒃ ᑲᖏᖅᖠᓂᕐᒥ.
ᐃᓚᒋᔭᐅᓪᓗᓂ ᑲᓇᑕᒥ ᐊᒻᒪ ᓄᓇᕘᒥ ᑮᓇᐅᔭᓕᐅᕈᑕᐅᓇᓱᒃᑐᓄᑦ $194 ᒥᓕᐊᓐ ᐅᖓᑖᓂ ᐱᕐᔪᐊᓄᑦ ᐊᐅᓚᔪᓐᓇᐅᑎᓄᑦ ᓄᓇᕗᒻᒥ, ᑭᕙᓪᓕᕐᒥ ᐊᑯᓂᐅᔪᒃᑯᑦ ᑲᒪᒋᔭᐅᕝᕕᒃ ᑐᙵᕕᒋᔭᐅᕗᖅ ᑲᑐᔾᔨᓗᑕ ᐱᓕᕆᐊᒃᓴᕆᑎᑕᐅᔪᑦ ᓯᕗᓪᓕᐅᑎᔭᕆᐊᓖᑦ, ᐃᓐᓇᕈᖅᐸᓪᓕᐊᓂᖅ ᐃᒃᐱᒋᔭᐅᑦᑎᐊᕐᓗᓂ. ᒫᓐᓇ ᐊᑐᖅᑕᐅᔪᖅ, ᖁᑦᑎᖕᓂᓕᒃ 4 ᐊᒻᒪ 5−ᒥᑦ ᐋᖅᑭᒃᓯᒪᕗᖅ ᐊᔾᔨᐅᙱᑦᑐᒥᑦ ᐸᖅᑭᔭᐅᖃᑦᑕᕈᒪᓪᓗᑎᑦ ᐃᓐᓇᐃᑦ ᐱᔭᕆᑐᔪᓂᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐱᔭᕆᐊᖃᖅᑐᑦ, ᐱᖃᑕᐅᓪᓗᓂ ᐃᓱᒪᐃᕈᑎᕙᓪᓕᐊᓂᖅ. 24−ᓂᒃ ᐃᒡᓕᖃᖅᖢᓂ, ᐃᓐᓇᐃᑦ ᑲᒪᒋᔭᐅᑦᑎᐊᕈᓐᓇᖅᐳᑦ ᐊᖏᕐᕋᖏᑕ ᖃᓂᒋᔮᓂ ᐅᐱᒋᔭᐅᓗᑎᒃ ᐊᒻᒪ ᖁᕕᐊᓲᑎᖃᕐᓗᑎᒃ ᐃᓄᐃᑦ ᐃᓕᖅᑯᓯᖓᓐᓂᒃ. ᑖᓐᓇ ᐃᓂᒋᔭᐅᔪᖅ ᑕᑯᒃᓴᐅᑎᑦᑎᕗᖅ ᐊᓐᓂᕆᔭᐅᔪᓂᑦ, ᖃᓄᐃᓕᐅᖅᑕᐅᕙᓚᐅᖅᑐᓂᑦ, ᐊᑐᖅᑕᐅᕙᒃᑐᑐᖃᕐᓂᒡᓗ ᓄᓇᕗᒻᒥᐅᓄᑦ.
"ᐅᓪᓗᒥ ᐱᐊᓂᒃᑕᐅᔪᑦ ᑭᕙᓪᓕᕐᒥ ᐃᓐᓇᐃᑦ ᑲᒪᒋᔭᐅᖏᓐᓇᖅᑐᒃᑯᕕᖕᒥ ᐅᔾᔨᕐᓇᖅᑐᒥᑦ ᐱᓕᕆᐊᖑᑦᑎᐊᖅᓯᒪᔪᑦ ᑲᖏᖅᖠᓂᕐᒥ ᕼᐋᒻᒪᓚᒃᑯᓐᓂ ᐊᒻᒪ ᓄᓇᕗᒻᒥᓕᒫᖅ," ᑲᓇᑕᒥ ᒐᕙᒪᒃᑯᑦ ᒥᓂᔅᑕᖓ ᐃᒡᓗᓕᕆᓂᕐᒧᑦ, ᐊᐅᓚᔪᓐᓇᐅᑎᓕᕆᔨᒃᑯᓐᓄᑦ ᐊᒻᒪ ᓄᓇᓕᖕᓄᑦ ᓇᐃᑦ ᐃᐊᑭᓐ−ᓯᒥᑦ. "ᑖᓐᓇ ᓄᑖᖅ ᑲᒪᒋᔭᐅᖏᓐᓇᖅᑐᒃᑯᕕᒃ ᐃᓐᓇᕐᓂᒃ ᑲᒪᒋᔭᐅᑎᑦᑎᓂᐊᖅᐳᖅ ᐊᒻᒪ ᐃᑲᔪᖅᑐᐃᓗᓂ ᐅᑭᐅᖏᓐᓂᒃ ᐱᑦᑎᐊᓕᖁᓪᓗᒋᑦ, ᐊᑯᓂᐊᓗᒃ ᐊᒃᑐᐃᓗᑎᒃ ᓄᓇᕗᒻᒥᐅᑦ ᖃᓄᐃᙱᑦᑎᐊᕈᓯᖏᓐᓄᑦ.”
"ᑐᙵᕕᖓ ᑲᑐᔾᔨᓗᑕ ᐱᓇᓱᐊᖅᑕᖓᑦ ᑖᒃᑯᐊ ᐃᓐᓇᖁᑎᕗᑦ ᐃᓐᓇᕈᕈᓐᓇᖁᓪᓗᒋᑦ ᑲᒪᒋᔭᐅᑦᑎᐊᕐᓗᑎᒃ ᐊᖏᕐᕋᒧᑦ ᖃᓂᓐᓂᖅᓴᐅᓗᑎᒃ," ᐅᖃᖅᑐᕕᓂᖅ ᓯᕗᓕᖅᑎ ᐲᔾᔭᐃ ᐊᕿᐊᕈᖅ. "ᓴᓇᔭᐅᓂᖓ ᑭᕙᓪᓕᕐᒥ ᐊᑯᓂᐅᔪᒃᑯᑦ ᑲᒪᒋᔭᐅᖏᓐᓇᖅᑐᒃᑯᕕᒃ ᐊᓪᓗᕆᐊᕈᑎᑦᑎᐊᕙᐅᔪᖅ ᐱᔭᕇᕋᓱᒡᓗᒍ ᑖᓐᓇ ᑐᕌᒐᖅ."
"ᐱᔭᕇᖅᑕᐅᓂᖓ ᐃᒡᓗᕐᔪᐊᖅ ᑭᕙᓪᓕᕐᒥ ᐊᑯᓂᐅᔪᒃᑯᑦ ᑲᒪᒋᔭᐅᖏᓐᓇᖅᑐᒃᑯᕕᒃ ᐱᕐᔪᐊᖑᓪᓗᓂ ᐊᓂᒍᖅᑕᐅᕗᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓄᓇᕗᒻᒥ. ᖃᑯᒍᑦᑎᐊᖅ, ᓯᕗᓪᓕᖅᐹᑦᑎᐊᕐᒥ, ᒪᓂᒪᑎᑦᑎᓂᐊᖅᐳᒍᑦ ᖁᑦᑎᓛᒥᑦ ᑲᒪᒋᔭᖃᖅᐸᖕᓂᕐᒥᑦ ᐃᓐᓇᕆᔭᑦᑎᓐᓂᑦ ᑕᒫᓂ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ, ᐱᕕᒃᓴᖃᖅᑎᓪᓗᒋᑦ ᐊᕐᕌᒍᖃᑎᒌᒍᓐᓇᕐᓂᕐᒥᑦ ᐃᒃᐱᒋᔭᖃᑦᑎᐊᕐᓗᑎᑦ ᖃᐅᔨᒪᓂᕐᒥᑦ ᐃᓕᖅᑯᓯᑐᖃᕐᓄᓪᓗ ᑐᙵᕕᓕᖕᒥᑦ ᐃᓂᒥᑦ," ᑕᐃᒪᓐᓇ ᒥᓂᔅᑕ ᒪᐃᓐ ᐅᖃᖅᖢᓂ. ᐅᓪᓗᒥ ᐊᔪᕐᓇᕋᔭᓚᐅᖅᑐᖅ ᐱᓇᔪᐃᓐᓇᓚᐅᙱᑉᐸᑕ ᐃᑲᔪᓚᐅᙱᑉᐸᑕᓗ ᐱᓕᕆᖃᑎᒋᔭᕗᑦ. ᐱᔭᕇᖅᑕᐅᓂᖓ ᑖᔅᓱᒪ ᐅᐸᒐᐅᑉ ᑕᑯᑎᑦᑎᔪᖅ ᐊᑑᑎᖃᕐᓂᖓᓂᑦ ᖃᓄᐃᓕᖓᔾᔪᑎᖏᓐᓂᒡᓗ ᐱᔭᕇᖅᑕᐅᔪᓐᓇᖅᑐᓂᑦ ᐱᓕᕆᖃᑎᒌᖕᓂᖅ−ᐱᓕᕆᖃᑎᒌᖕᓂᖅ ᑲᑐᔾᔨᖃᑎᒌᒍᑕᐅᔪᒧᑦ ᐱᔾᔪᑎᒧᑦ.
"ᑖᓐᓇ ᐊᑯᓂᐅᔪᒃᑯᑦ ᑲᒪᒋᔭᐅᖏᓐᓇᖅᑐᒃᑯᕕᒃ ᑲᑐᔾᔨᖃᑎᒌᒃᖢᑕ ᐱᓇᔪᖕᓂᐅᕗᖅ ᐊᒻᒪ ᐱᓕᕆᓪᓚᕆᒍᒪᓂᖅᐳᑦ ᓴᙱᒃᑎᒋᐊᖅᑎᑦᑐᒪᓪᓗᒋᑦ ᖃᓄᐃᙱᑦᑎᐊᕈᓯᖏᑦ ᐃᓐᓇᖁᑎᕗᑦ ᖃᑕᙳᑎᖏᓪᓗ ᖃᐅᔨᒪᓗᒋᓪᓗ ᐃᓐᓇᖁᑎᕗᑦ ᐱᓕᕆᑦᑎᐊᖏᓐᓇᕈᓐᓇᕐᓂᖏᓐᓂᑦ ᐱᑦᑎᐊᓕᓗᑎᒃ ᐃᒃᐱᒍᓱᑦᑎᐊᕐᓗᑎᒡᓗ ᓄᓇᕗᒻᒥ," ᐅᖃᓚᐅᖅᐳᖅ ᒥᓂᔅᑕ ᔪᐊᓇᓯ.
ᑕᖅᑭᓄᑦ ᖃᔅᓯᐊᕐᔪᖕᓄᑦ ᐊᒡᒋᖅᑐᓄᑦ, ᑖᓐᓇ ᐃᓂᒋᔭᐅᔪᖅ ᐱᓕᕆᐊᖃᓪᓚᕆᖕᓂᐊᖅᐳᖅ ᐱᕙᒌᔭᖅᐸᓪᓕᐊᓂᕐᒥᒃ ᐊᑦᑕᕐᓇᙱᑦᑐᒃᑯᑦ ᐃᓯᖅᑎᑕᐅᓇᔭᕐᓂᖏᓐᓄᑦ ᐃᓐᓇᐃᑦ, ᓇᓗᙱᑦᑎᐊᕈᒪᓂᕐᒥᓄᑦ ᑕᒪᕐᒥᑦᑎᐊᖅ ᐊᑐᖅᑕᐅᕙᒃᑐᑦ ᐊᑕᖏᕐᓗᑎᒃ ᐊᐅᓚᔪᓐᓇᕋᓗᐊᕐᒪᖔᑕ, ᐃᖅᑲᓇᐃᔭᖅᑏᓪᓗ ᐱᑐᐃᓐᓇᕆᐊᖃᓕᕐᓗᑎᒃ ᐱᑎᑦᑎᔪᓐᓇᕐᓂᕐᒥᑦ ᖁᑦᑎᓛᒥᑦ ᐊᑐᖅᑕᐅᕙᒃᑐᒥᑦ ᑲᒪᒋᔭᖃᕐᓂᐊᕐᓗᓂ ᐱᒋᐊᕐᓗᑎᑦ ᑕᒪᑐᒪᓂ ᐅᐱᕐᖔᒥ.
ᑭᓇᑐᐃᓐᓇᖅ ᐊᐱᖅᑯᑎᒃᓴᓕᑦ ᓄᓇᕗᒻᒥ ᐊᑯᓂᐅᔪᒃᑯᑦ ᑲᒪᒋᔭᐅᖏᓐᓇᖅᑐᒃᑯᕕᖕᓂ ᐃᓯᖅᑎᑕᐅᔾᔪᑎᓄᓪᓗ ᐱᕙᓪᓕᐊᓂᕐᒧᑦ ᐅᐸᒍᓐᓇᖅᑕᖓ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᑭᐊᖅᑭᕕᖓᓐᓂ.